Sport, divertiment, da mangiar e da baiver ed in program musical – Quai porscha il «Big Air Chur 2024». Durant dus dis sa preschentan nov musicistas e musicists.
Il venderdi tutga al hip hop cun trais acts tudestgs ed ina Svizra. La giuvna en la runda è la newcomera da Turitg Lou Kaena. Cun 16 ha ella gia publitgà ses emprim album, il 2023 ha ella stuì dar in chanaster a l’Open Air Frauenfeld perquai ch’ella ha gì examens dal gimnasi ed ella è gia stada al CYPHER23:
Da la Germania, pli exact da Berlin-Wedding, vegn $oho Bani. Avant che cumenzar il 2017 cun rap è Felix von Heymann, sco $oho Bani ha num per propi, stà giugader da Basketball tar Alba Berlin. Dapi lura ha el publitgà quatter albums e tranter auter era fatg ina chanzun cun la rapcrew «01099» ch’èn stads quest’onn a l’Open Air Lumnezia.
Da Berlin vai a Frankfurt cun il rap duo Mehnersmoos che sa cumpona da Tobias Mehner (Maydn) e Frederik Moos (MadFred). Omadus èn musicists da professiun ch'han studegià musica al «Dr. Hoch’s Konservatorium» a Frankfurt. Dapi il 2010 fan els ensemen musica.
Sco Headliner dal venderdi suonda Bonez MC. Il rapper da Hamburg fa part da la «187 Strassenbande» – ina gruppa da Hamburg ch’è vegnida fundada il 2006. Bonez MC è adina puspè era solo da viadi ed ha tranter auter publitgà dus albums.
La sonda vegn pli colurusa e pli electronica. Il duo da Cuira Happy for Real fa il cumenzament. Marcus Petendi ed Olivia Virgolin han publitgà lur emprima EP «Desperate Art». Dapi lura han els gì divers concerts ed èn stads la selecziun da l’acziun «Mx3 – Tuts per in».
Cun 77 Bombay Street restain nus en il Grischun. Ils frars Matt, Joe, Esra e Simri na ston ins pli probabel betg pli preschentar. Dapi 2007 fan els musica, èn stads pliras giadas a l’Open Air Lumnezia e franc han blers anc lur hits «47 Millionaires», «Up in the Sky» ubain «I Love Lady Gaga» en l’ureglia.
Per la colur procura lura Nemo ch'ha gudagnà quest onn l’ESC per la Svizra. Là vegn la persuna musicala da Bienna franc er a preschentar ses hit actual «The Code», in costum ed ina show giaglia.
La gruppa austriaca Wanda fan dapi il 2012 musica ed han publitgà sis albums. Lur musica sauta tranter rock, indie ed austro-pop. Insaquantas da lur chanzuns han er gì success sin palancà internaziunal. Tranter auter «Bologna», «Bussi Baby» ubain «Columbo».
Paul Kalkbrenner è il headliner da la sonda. Il musicist e producent da Leipzig en Germania fa oravant tut musica electronica. La spezialitad da ses concerts è ch’el prenda dapart ses agens tocs ed arranscha quels live da nov. Gia il 1999 ha el publitgà sia emprima EP.
Ed uschia tunan ils acts dal Big Air Chur 2024:
