L’ultima giada era il campiunadi mundial nordic avant 14 onns en il pajais mamma dal sport da passlung, la Norvegia. Uss turna il campiunadi mundial a Trondheim. Durant dudesch dis cumbattan las meglras atletas ed ils megliers atlets nordics per medaglias. La delegaziun svizra da l’equipa da passlung cumpiglia 14 atletas ed atlets. Trais da quels èn Engiadinais e novizs.
Marina Kälin, Roman Alder e Noe Näff
Marina Kälin da San Murezzan ha la pli gronda experientscha sin livel da la cuppa mundiala. Ed ella è era campiunessa mundiala sut 23 onns en la disciplina sur 20 kilometers en il stil liber. Ella ha mussà durant quest enviern buns resultats, surtut cun la staffetta maschedada.
Roman Alder da Puntraschigna ha pudì festivar durant quest enviern sia premiera en la cuppa mundiala da passlung. Tar il Tavau Nordic, a Les Rousses en Frantscha ed er tar las cursas da la cuppa mundiala a Silvaplauna, era il giuven passlungist da la partida.
In program quasi identic ha er gì Noe Näff da Sent. Tar las cursas da la cuppa mundiala a Silvaplauna è el sa qualifitgà per l’emprima giada per la fasa da k.o. dad in sprint. Er quella buna prestaziun ha gidà che Noe Näff e da la partida a Trondheim.
Rimnar experientschas
Per il trio vala surtut in: rimnar experientschas. Probabel n’ha anc nagin dals trais engiadinais pudì currer davant ina tala culissa. En Norvegia a Trondheim vegnan spetgads plirs 10’000 fans tar las singulas curas. L’atmosfera dal campiunadi mundial en il pajais mamma dal sport da passlung vegn ad esser fantastica. E sch’i tanscha lura anc per bunas prestaziuns, èsi anc meglier. Quellas experientschas na pon ins betg cumprar.