Il passlunghist norvegiais Johannes Hösflot Kläbo ha gudagnà per la 100avla giada ina cursa da la cuppa mundiala. Sco meglier Svizzer è Valerio Grond da Tavau vegnì quart. Tar las dunnas ha gudagnà la Svedaisa Jonna Sundling, Alina Meier è vegnida 10avla.
Dus Engiadinais en ils puncts
Ina buna prestaziun han er mussà dus giuvens Engiadinais. Entant che Roman Alder da Puntraschigna ha cuntanschì per la segunda giada ils finals d’in sprint da la cuppa mundiala, è quai reussì a Noe Näff da Sent per l’emprima giada.
En la cursa da qualificaziun èn ils dus giuvens sa qualifitgads cun precis il medem temp per la fasa da k.o. En il quartfinal n'hai lura per tuts dus betg pli tanschì per arrivar vinavant. Tar la cursa a chasa han Alder e Näf la finala cuntanschì las plazzas 18 e 24 – quai è per omadus pia il meglier resultat da la carriera.
