Era suenter l’èra Dario Cologna datti passlunghistas e passlunghists grischuns cun grond potenzial d’ina giada far furora en la cuppa mundiala. Quai mussan ils resultats dals juniors e giuvenils sut 23 onns al campiunadi mundial da ski nordic a Planica en la Slovenia. Els èn turnads gist cun quatter medaglias. Tuttas èn idas en l’Engiadina.
Tranter auter è Marina Kälin (20) vegnida campiunessa mundiala tar las U23 en la cursa da 20 kilometers en il stil liber, quai sco ina da las pli giuvnas. Ella ha er battì en questa cursa tut las concurrentas ch’èn in, respectiv dus onns pli veglias. Sia sora Nadja Kälin (22) ha gudagnà argient tar las U23 en la cursa da 10 kilometers en il stil classic.
Questa medaglia dad aur dat enorma motivaziun e mussa era ch’jau sun sin la dretga via.
Il success a Planica n’è però nagina garanzia ch’i gartegia la finala da cumbatter a la testa tar l’elita en la cuppa mundiala. Mo las premissas èn bunas. Omaduas han il talent, la disciplina da trenar, gronda motivaziun e bunas cundiziuns cun esser en l’Engiadina, nua che la garanzia da naiv è uschè buna sco nagliur auter en Svizra.
Bunas premissas per l'avegnir
Dad in maun èn Marina e Nadja Kälin soras e partenarias da trenament. Ellas sustegnan ina l’autra e pon er profitar ina da l’autra. Da l’auter maun èn ellas era concurrentas en in sport singul, nua che mintgina vul cuntanscher il maximum en mintga cursa. Entant che Nadja Kälin, la sora gronda, ha gia pudì fitgar pe en la cuppa mundiala cun divers plazs sut las top 20 sco er cun gia esser sa participada a gieus olimpics ed avair terminà quest onn per l’emprima giada il Tour de Ski – è uss era la sora giuvna Marina Kälin sin buna via da far quai pass en la cuppa mundiala.
Dario Cologna è gia adina stà mes grond idol. E sch’jau gudogn ina giada be la mesadad da quai ch’el ha gudagnà, fiss quai grondius.
La carriera è pia lantschada da moda optimala. Uss vali da cuntinuar sin questa via, perquai ch'il siemi da las soras Kälin è dad era gudagnà ina giada in medaglia ad in campiunadi mundial da l’elita – anc pli gugent ina medaglia olimpica.