Gist set atlets e las atletas engiadinaisas pon ir a la partenza d'ina cursa da la cuppa mundiala en l'Engiadin’Ota:
Il venderdi saira han lieu las cursas da staffeta maschadada, la sonda las cursas da sprint e la dumengia lura per finir las cursas da distanza cun partenza sin il Lai da San Murezzan che va a fin a Silvaplana Surlej. Per las atletas ed ils atlets engiadinais èsi segir in siemi d'ir a la partenza d'ina cursa da la cuppa mundiala da passlung en lur patria. L’onn 2021 avevi gia dà cursas da la cuppa mundiala da passlung durant la pandemia da corona. Uss èn las cursas enavos en l'Engiadin’Ota e quai gist sur quatter onns. La destinaziun ha numnadamain era gia ils contracts per cursas da l’onn 2027 e 2029.
Jau sun adina cuntenta cura ch'jau poss esser qua.
Tranter las set atletas ed atlets èn era ils fragliuns Roman e Fabienne Alder da Puntraschigna che sa legran fitg da pudair sa mesirar en lur dachasa l'Engiadin'Ota cun ils megliers dal mund. Sin il traject a Silvaplana hajan els gia bleras giadas fatg ils trenaments, i saja bel ch'era las cursas han ussa lieu là, declera Roman. Roman Alder ha gì sia premiera a la cuppa mundiala da passlung avant bun in e mez mais tar la cursa da Tavau Nordic. Tar la cursa da sprint ha el cuntanschì il 24avel plaz, in bun plaz. Medem bun u meglier vul Roman Adler era far en l'Engiadin'Ota. Era sia sora Fabienne Adler è nominada per la cursa da sprint en l'Engiadina ed ha gì sia premiera il december passà. Tut ils set atlets ed atletas spetgan cun plaschair anticipà sin las cursas ed han gust da mussar tge ch'els san en lur dachasa.
