Nino Schurter, Mathias Flückiger, Alessandra Keller e Jolanda Neff vegnan a represchentar la Svizra a las cursas da mountainbike als gieus olimpics da questa stad a Paris. Quai ha communitgà Swiss Cycling tard la dumengia saira, curt suenter las cursas da la cuppa mundiala a Nove Mesto en Tschechia, las davosas cursas ch'han quintà per la qualificaziun per Paris.
Nino Schurter
Per Nino Schurter èn ils gieus a Paris gia ils tschintgavels gieus olimpics. Il meglier mountainbiker da l'istorgia cumbatta a Paris per sia quarta medaglia olimpica suenter bronz il 2008 a Peking, argient il 2012 a Londra ed aur il 2016 a Rio. Als davos gieus olimpics a Tokio era Schurter vegnì quart.
Mathias Flückiger
Per Mathias Flückiger ch'ha survegnì la precedenza envers Filippo Colombo, Lars Forster u Marcel Guerrini èn ils gieus a Paris era gia ils terzs gieus olimpics. Avant trais onns a Tokio aveva il Bernais gudagnà argient davos il Brit Tom Pidcock.
Alessandra Keller
Nagina surpraisa è la nominaziun d'Alessandra Keller ch'è stada ils davos onns la meglra mountainbikera svizra. Il 2022 ha Keller tranter auter gudagnà il classament general da la cuppa mundiala. Era la davosa fin d'emna a Nove Mesto ha Keller demonstrà sias ambiziuns cun gudagnar la cursa da short track e cun daventar terza en la cursa da cross-country. Per la mountainbikera dal chantun Sutsilvania èn ils gieus a Paris ils emprims da sia carriera.
Jolanda Neff
Il segund ticket per Paris ha survegnì Jolanda Neff che survegn uschia la schanza da defender ses titel olimpic. A Tokio aveva Neff triumfà avant Sina Frei e Linda Indergand ed uschia procurà per in triumf istoric per la Svizra. Quest onn a Paris po mintga naziun però be pli trametter dus atlets e duas atletas a la partenza.
Las duas cursas olimpicas da mountainbike a Paris èn ils 28 e 29 da fanadur.
