La stad ha la giuvna skiunza da San Murezzan Faye Buff fatg il pass en il cader C da Swiss Ski. Cun ventg onns po ella pia profitar per l’emprima giada da las cundiziuns da trenament e da l’infrastructura da Swiss Ski. Gia baud ha Faye Buff cumenzà cun il sport da skis, sin livel da juniora ha ella gia pudì festivar in ni l’auter success. Uss duess quai ir enavant da la stgala si. Suenter ch’ella ha fatg ils pass sin livel regiunal sur il club da skis Alpina San Murezzan, en il cader da la Federaziun da skis grischuna ed en il cader naziunal da l’ost, è il pass en il cader C da Swiss Ski fin uss il pli grond.
Cumenzà cun patinadi artistic e sa decidida per il sport da skis
Il sport da skis era l’emprima gronda amur da Faye Buff. Dentant er il sport da patinadi artistic. Fin ch’ella era tredesch onns veglia ha el fatg part in per giadas al campiunadi svizzer da patinadi artistic. Lura è ella sa decisa per il sport da skis, e dapi lura fa ella in pass suenter l’auter. Arrivada en il cader C da Swiss Ski, dispona Faye Buff uss per exempel dad in um da service che prepara ses skis.
Dapli temp per trenament e recreaziun
Sport professiunal è insatge che duai capitar cumplessiv. Sport da prestaziun includa trenament, recreaziun, il nutriment, il studi da video e bler auter. Sport è insatge fitg cumplex. Cun far il pass en il cader C da Swiss Ski è quai uss avant maun. A partir dad uss po la giuvna sportista sa concentrar dal tuttafatg sin il sport da skis. Durant la proxima stagiun vul Faye Buff ir a la partenza da cursas da slalom en la cuppa europeica.