L'entira vita hai mo dà ina chaussa da la damaun fin la saira. Els ed ellas han vivì per la finamira da daventar sportist u sportista professiunala e far gronda carriera. Ma, tge fan atlets ed atletas da professiun suenter la carriera activa? Quant grev èsi da cumenzar cun insatge totalmain nov? Datti forsa er schanzas?
En questa «Marella» avain nus discurrì cun dus anteriurs sportists ed ina anteriura sportista per sentir il puls. La finamira e l'idea è stada – da discurrer cun persunas che han bain fatg ina stupenta carriera, dentant betg cun superstars che han fatg milliuns. Perquai vegnan a pled l'anteriur skiunz Franco Cavegn (53) ch'è en sia carriera stà duas giadas sin il podest en la cuppa mundiala, il hockeyan Corsin Camichel (43) che ha dà var 500 gieus en la pli auta liga svizra, e Seraina Friedli (31) ch'è mo durant parts da sia carriera stada profi da ballape e che ha dà en tut 10 gieus per la naziunala svizra.
Franco Cavegn – anteriur skiunz
16 onns ha la carriera da skis da Franco Cavegn cuzzà. Il Lumnezian ch'ha oz 53 onns, ha durant quests onns fatg duas giadas il pass sin il podest en la cuppa mundiala. Il 2001 a Garmisch sco er il 2002 a Kvitfjell è Franco Cavegn vegnì terz en la cursa rapida. Durant sia carriera è el arrivà en 35 cursas tranter ils top 10 – per in plaz sisum il podest n'hai dentant mai tanschì. E sia carriera è era adina stada accumpagnada da blessuras. Terminà quella ha el il 2005.
Forsa dus onns avess jau, cun ils daners ch'jau hai fadigià dad ir cun skis, pudì viver senza lavurar
Seraina Friedli – anteriura ballapedista
Il november 2023 ha l'Engiadinaisa terminà sia carriera sco ballapedista, cun mo 30 onns. «Il fieu per la passiun da ballape è svanì» è stada l'argumentaziun da la golia. Durant ses temp da ballapedista ha Seraina Friedli tranter auter dà per Turitg, YB, Fiorentina San Gimignano en l'Italia, Aarau e sco finiziun er anc per Anderlecht en la Belgia. Plinavant è la sportista da La Punt Chamues-ch era stada sur plirs onns part da la naziunala svizra. En tut ha ella purtà diesch giadas il tricot svizzer en in gieu cun la naziunala.
Suenter la carriera da ballape hai jau gì il sentiment, ch'jau sai mo far insatge che ha da far cun il sport.
Corsin Camichel – anteriur hockeyan
Var 500 gieus ha il Schlarignot dà en la pli auta liga da hockey svizra. Quai per Ambri-Piotta, Berna, Zug e Tavau. Er per la naziunala è Corsin Camichel stà trais giadas en acziun. Durant sia carriera ha el dentant er gì da cumbatter cun il destin. Il 2011, cun strusch 30 onns ha el survegnì la diagnosa da cancer da las glondas limfaticas. El dumogna la malsogna e turna anc ina giada enavos sin il glatsch. Il 2013 ha el dentant terminà sia carriera. E la malsogna ha laschà enavos fastizs.
Jau n'hai mai fatg gronds plans. La vita va adina en sia atgna direcziun.
Sustegn per sportistas e sportists suenter la carriera
Agid per atletas ed atlets suenter la carriera – ditg na devi strusch quai. Duront ils temps da Franco Cavegn ed er anc da Corsin Camichel eri magari quasi in tabu da discurrer davart il futur, e tge ch'ins vul prender a mauns suenter la carriera sportiva.
Ils ultims onns hai dà midadas en quest connex. Il 2020 è vegnida fundada la «Athletes Network», ina rait che gida sportistas e sportists da fitgar pe en il mund da lavur, tranter auter er suenter la carriera. Chau da questa rait è Benjamin Huggel. L'anteriur giugader naziunal da ballape di ch'els hajan gia lavurà ensemen cun var 3'000 sportistas e sportists. Er l'anteriura golia da ballape grischuna Seraina Friedli ha dumandà per agid tar la «Athletes Network». Ella ha era grazia a questa rait survegnì la fidanza ch'ella saja dapli che mo ina sportista.