Igl è in cudesch ch'è in mix da biografia e mussavia – 180 paginas Carlo Janka total cun anecdotas.
- Per exempel raquinta Carlo Janka en il cudesch era davart temas sco quella da la cursa rapida a Kitzbühel il 2009. Suenter che Daniel Albrecht era crudà grevamain aveva el studegià da dir als trenaders ch'el desistia da la cursa, cunquai ch'el haja che tiria il dies. La finala saja el tuttina ì a la partenza e vegnì 20avel.
- ll cudesch cuntegna dentant era passaschas cun bler humor. Per exempel pon ins leger da las numerusas visitas che Carlo Janka ha fatg en ina chadaina da fast-food. Quai sco junior, dentant er anc durant gieus olimpics.
Il cudesch mussa pia dapli che mo il «Iceman» ch'el era durant sia carriera activa. El raquinta da ses sentiments e ses dubis ch'el ha magari gì durant ses temp sco skiunz.
Suenter la carriera èsi pli simpel da s'exponer e da raquintar tge ch'ins pensava en tschertas situaziuns.
Scrit il cudesch ha l'autur grischun Philipp Gurt, ch'è enconuschent – tranter auter – per ses cudesch «Schattenkind» u per ses crimis. Scriver in cudesch cun e davart Carlo Janka saja stà in'experientscha speziala cun numerus telefonats. Trais giadas sajan els sa scuntrads e betg main che 241 giadas hajan els telefonà in cun l'auter.
Philipp Gurt tradescha ch'el haja scrit la gronda part da la biografia entaifer duas fin trais emnas. Quai funcziunia tar el sco ina maschinaria cura ch'el haja tut las infurmaziuns. Uschia è resultà la finala il cudesch «Durchbruch: Mein Weg – Dein Erfolg» che raquinta dal buob schenà da Sursaissa ch'è stà pront da far tut per ses siemi.
Dapli litteratura:
Ils 2 e 3 da november han lieu ils dis da litteratura a Domat. RTR è er al lieu e porscha in livestream e liveticker.
Tschertgais insatge nov da leger? Tips da la redacziun online: