L’Engiadina è puspè in dals umblitgs dal sport da passlung. Cun la cursa da las dunnas è l’emna dal Maraton da skis engiadinais vegnida lantschada per dal bun. Durant quest’emna spetga l’emprim anc la cursa da notg. La cursa che maina las curriduras ed ils curridurs durant la notg da Segl a Puntraschigna. E la dumengia alura il punct culminant, la 55avla ediziun dal Maraton da skis, 42 kilometers da Malögia a S-chanf.
Profitar dal service da tschairar
Curt avant la cursa roiala è quai quiet tar las scolas da passlung en Engiadina. Cler datti in ni l’auter che vul anc ina giada filar vi da la tecnica da passlung ensemen cun ina magistra ni in magister da passlung. La gronda lavur or dal punct da la tecnica è dentant fatg. Uss sa concentreschan las scolas da passlung da la regiun sin la gronda massa da clientella che vul per la dumengia il ski perfect. Las scolas da passlung han uss pia il pli bler da far en il local da tschairar.
Tuttas scolas da passlung che RTR ha dumandà porschan in service da tschaira. E quel vegn nizzegià da la clientella fitg ferm. La gronda lavur è pia uss tschairar ils skis da passlung, per che tuttas e tuts che fan part la dumengia al Maraton da skis engiadinais pon far quai cun il meglier material pussaivel.
Plirs tschient skis da passlung vegnan preparads
Cura ch'i va per il material èn quasi tuts tuttina. Mintgina e mintgin che va a la partenza dal Maraton da skis engiadinais vul il meglier material vi dals pes. Qua na vegnan fatg nagins cumpromiss. Ed uschia tschairan las scolas da passlung da Puntraschigna, da Schlarigna e da Scuol plirs tschient skis da passlung per la cursa da la dumengia.
Qua tar la survista cumplessiva
che vegn actualisada cun mintga chaschun.