Cun fatschas cuntentas èn Salomé e Fabiana Zen da la Val Müstair arrivadas a S-chanf, a l’arrivada da la Cursa da dunnas dal Maraton da skis engiadinais. Las preparativas durant tut l’enviern sin la cursa sur 17 km s’èn verifitgadas. Salomé Zen ha duvrà 50:53 sia sora pli giuvna è arrivada a S-chanf en in temp da 49:33.
Tut haja funcziunà sco giavischà, uschè las duas soras da Sta. Maria. Quai malgrà che l’agitaziun curt avant la partenza saja stada fitg gronda. Surtut per Fabiana Zen ch'ha gì da spetgar 5 minutas fin ch’ella ha pudì partir sin ils fastizs da sia sora Salomé. Cuntentas èn tuttas duas, cunquai ch’ellas han er cuntanschì lur finamira persunala da currer en in temp da sut in’ura.
Scuvrì ina nova passiun
Il sport da passlung n'era enfin avant dus onns insumma betg d’interess, admetta la pli veglia da las soras, Salomé Zen. Che sia sora pli giuvna, Fabiana, haja intimà da trenar e sa participar a la cursa. Ellas duas motiveschian er adina puspè ina l’autra per ir a trenar tranter trais e quatter giadas l’emna.
La concurrenza tranter nus duas fa bain. Uschè ves ins er nua ch’ins stat e sche la sora è tranteren pli svelta, datti a mai er dapli motivaziun.
-
Bild 1 von 3. Fabiana Zen passenta gugent ses temp liber en la natira. Bildquelle: mad sors Zen.
-
Bild 2 von 3. Ensemen cun la sora Salomé èn ellas en viadi da tut las uras cun ils skis da passlung. Bildquelle: mad sors Zen.
-
Bild 3 von 3. ... ed il pli bel mument è cura ch'ellas èn a l'arrivada da la cursa da dunnas a S-chanf. Bildquelle: mad sors Zen.
Grondas preparativas curt avant la partenza da la cursa da dunnas na dettia uss betg pli. Ils ultims dus dis vegnia dà al corp ina pausa, avant che currer la dumengia ils 17 km sche pussibel en in temp da sut in’ura, uschia la finamira da las duas soras.
Er sche la cursa n’avess betg dad ir sco giavischà, il plaschair dad esser vegnida en l’arrivada a S-chanf, quel è fitg grond.
Per entant sa focusseschian ellas sin la cursa da dunnas. Bain pussibel saja dentant, ch’ellas partan ina giada er a la gronda cursa da passlung – il Maraton da skis engiadinais da Malögia a S-chanf, tradeschan las duas soras ch'abitan ensemen a Samedan.
Qua tar la survista cumplessiva
che vegn actualisada cun mintga chaschun.