Per l’emprima giada han ins controllà la stagiun passada ils skis da curriduras e curridurs dal Maraton da skis engiadinais sin tschaira da fluor. Ils organisaturs da la cursa avevan organisà a cura vista la pussaivladad da testar skis. Per la controlla è la Federaziun internaziunala da skis FIS responsabla. Il Maraton metta be a disposiziun l’infrastructura per far questas controllas. Cuntrari a la stagiun passada, cura ch'ins aveva organisà ina tenda per far questa controllas, vegnan ellas uss fatgas endadens. Uschia san ils controlladers lavurar en in conturn in zichel pli quiet vi dals skis.
Tgi che vegn traplà, vegn exclus per dus onns dal Maraton
Il chasti è drastic, sch'insatgi vegn traplà cun skis ch’èn contaminads cun tschaira da fluor. Subit vegn questa persuna disqualifitgada ed exclusa durant dus onns da las cursas dal Maraton.
Quai fa mal – sche nus vulain dentant quietezza, alura avain nus da far quai uschia.
Tar ils profis n'è fluor nagin tema pli
Las equipas enturn ils pli sperts passlunghists e passlunghistas han gia chattà tschairas ch’èn amplamain uschè bunas sco quellas che cuntegnevan fluor. Tar ils profis na bitta la tschaira da fluor betg pli grondas undas. Auter è quai tar curriduras e curridurs populars. Savens han els anc giun tschaler tschaira che cuntegna fluor. Ed uschè ditg ch’els han anc da quella tschaira, vegn ella era duvrada.
Or da l'archiv:
