En media 1'300 fans e tar singuls gieus var 2'000 aspectaturas ed aspectaturs han visità ils gieus da chasa da l'EHC Cuira durant la qualificaziun. En il decurs da las ultimas emnas è ina vaira euforia creschida enturn il club da hockey da la chapitala grischuna. La qualificaziun per ils playoffs è stada il punct culminant d'emnas intensivas. Ussa spetga en il quartfinal dals playoffs da la Swiss League il HC Turgovia. La seria cumenza ils 11 da favrer.
Senza squitsch en ils playoffs
Gia la qualificaziun per ils playoffs è in grond success per l'EHC Cuira. Che l'equipa vegnia en l'emprima stagiun en la Swiss League gia da tegnair pitg cun ils adversaris han ils pli paucs quintà. Ma perfin encunter las equipas a la testa sco Basilea u La Chaux-de-Fonds ha l'equipa da Reto e Jan Von Arx festivà victorias.
Igl è simplamain bellezza da vesair co l'EHC Cuira sa sviluppescha actualmain. Quai fa bain al cor.
Cun il cor tar l'EHC Cuira
-
Bild 1 von 4. Trais fans passiunads da l'EHC Cuira. Bildquelle: RTR.
-
Bild 2 von 4. Othmar Kressig. Oriund da Landquart, viva el dapi blers onns a Cuira ed è dapi 25 onns fan da l'EHC Cuira. Bildquelle: RTR.
-
Bild 3 von 4. Fabian Maasch. L'um da Domat è president dal club da fans e dapi ch'el po pensar fan da l'EHC Cuira. Bildquelle: RTR.
-
Bild 4 von 4. Adrian Tumler. Il fan da la regiun da Sargans è dapi almain 30 onns fan da l'EHC Cuira. Bildquelle: RTR.
I n'è betg uschia ch'il club n'ha gì naginas sfidas durant l'emprima stagiun en la Swiss League, suenter onns en l'anonimitad. L'october fin il november hai per exempel dà ina fasa cun nov terradas en roda. Il club enturn il president Carmine Di Nardo n'è dentant mai vegnì hectic. Cun quietezza e fidanza en ils trenaders ha l'equipa chattà enavos sin la via da success.
Plirs fans da l'EHC Cuira han ditg envers RTR ch'igl haja fatg surstar, co l'equipa ha persvas questa stagiun. Senza giugaders esters n'hajan els betg pensà ch'i funcziunia uschè bain. Perquai saja la situaziun actuala simplamain bellezza. I fetschia simplamain bain da vesair co il club è sa stabilisà ils ultims onns e questa stagiun saja sco in punct culminant.
Fin tar l'onn 2002 era l'EHC Cuira adina puspè in club ch'era da chattar en la liga naziunala A.
Cun la relegaziun en la liga naziunala B il 2002 è la situaziun sa midada. Il club ha gì da cumbatter cun problems finanzials ed è ils proxims onns crudà fin en la 2. liga.
Suenter plirs onns en 1. liga èsi ils ultims onns, pass per pass, puspè ì ensi cun l'EHC Cuira. Cun la promoziun en la Swiss League (liga naziunala B) la stagiun 2023/2024 è il club da la chapitala grischuna turnà, suenter onns en ligas pli bassas, sin la charta da hockey svizra.
Il president che viva per il club
Carmine Di Nardo è dapi l'avust 2023 a la testa da l'EHC Cuira. Dapi ch'el ha surpiglià quest uffizi viva el per il club. Durant la qualificaziun questa stagiun saja el stà da la partida tar mintga gieu da chasa ed era tar la gronda part dals gieus ordaifer – quai malgrà ch'el lavura sper ses uffizi sco preisdent anc adina 100% tar ils servetschs psichiatrics dal chantun Son Gagl. Il president viva per ses EHC: el è quel che beneventa avant ils gieus ils sponsurs, ma era quel ch'è sco sin spinas durant muments decisivs sin il glatsch. E sch'i manca ina giada insatge en l'ustaria n'è Carmine Di Nardo era betg memia bel d'ir a gidar là. Quai aud'ins da pliras varts sch'ins discurra davart il president.
Sco president fai simplamain plaschair da vesair co l'equipa dat hockey. Il club vegn er adina pli attractiv per ils aspectaturs.
L'interess vi da l'EHC Cuira è creschì ad in crescher. Ir atras la citad senza far magari in paus e discurrer davart la situaziun actuala na po il president betg pli: «L'EHC Cuira è propi dumandà tar la populaziun.»