La premiera sin nivel da la cuppa mundiala da passlung ha l’Engiadin’Ota festivà avant quatter onns. Durant la pandemia da corona han ins organisà en la regiun da Silvaplauna cursas da la cuppa mundiala, lura dentant anc senza public. Quatter onns pli tard turnan las meglras passlungistas ed ils megliers passlungists en la val.
L’infrastructura è pronta
Dus dis avant ch'ils duels dals megliers sin la loipa en Engiadin’Ota han lieu è l’infrastructura pronta. Malgrà ch'i vegn anc lavurà intensivamain vi da singuls detagls èn las tribunas, las differentas tendas e las saivs tranter zona da partenza ed il public montadas. Actualmain vegn be pli lavurà vi da pitschens detagls. Er la loipa è gia en funcziun. Quella è vegnida fatga gia avant Nadal, uschia ch'er il public ha pudì far passlung sin la loipa da l’Engadin’Ota.
Impresssiuns da las preparativas
-
Bild 1 von 3Legenda: L'arrivada da las cursas da passlung a Silvaplauna spetga be amo sin public, sportists e sportistas. RTR
-
Bild 2 von 3Legenda: Cuppa mundiala da passlung a Silvplauna RTR
-
Bild 3 von 3Legenda: A Silvaplauna stat l'infrastructura. RTR
Preventiv dad 1,2 milliuns francs
Las cursas da la cuppa mundiala da passlung en l'Engiadin’Ota vegnan finanziadas cun in importa dad ina mesa milliun atras las vischnancas da l’Engiadin’Ota, 400'000 francs contribueschan la federaziun Swiss Ski e sponsurs. Il rest vulan ins segirar cun entradas e cun sustegn dal chantun Grischun e da la Confederaziun.
Il president dal comité d’organisaziun, Menduri Kasper, è persvas da rabagliar ensemen la munaida per porscher sport da passlung interessant ed attractiv in Engiadina. Gia uss è cler che la cuppa mundiala da passlung vegn a turnar en la regiun era ils onns 2027 e 2029.