Las cursas da la cuppa mundiala a San Murezzan van a fin cun in'ulteriura buna prestaziun svizra. Suenter la plazza da podest il venderdi cun la staffetta mixta e la quarta plazza da Valerio Grond en il sprint, ha per finir era Jonas Baumann procurà per in bun resultat.
Tar la cursa da distanza sur 20 kilometers cun partenza da massa davent da San Murezzan fin a Silvaplauna Surlej è il Rumantsch vegnì 12avel. Quai è in fitg bun resultat e mussa che Jonas Baumann n'è betg mo en furma tar las cursas da distanza en il stil classic, mabain er en il stil liber. Avant in’emna aveva Baumann realisà cun ina otgavla plazza tar las cursas a Les Rousses en Frantscha ses meglier resultat da la carriera.
Per mai èsi stà fitg impurtant d'era mussar en il skating ina buna cursa.
Be in'emna pli tard suttastritga Baumann sia buna furma era tar las cursas en l'Engiadin’Ota. Il curridur da 34 onns è pia pront per ils campiunadis mundials ch'han alura lieu il favrer a Trondheim en la Norvegia.
Er la cursa da las dunnas è stada enta maun da las passlungistas norvegiaisas. Astrid Slind ha gudagnà la cursa avant Nora Sanness. Meglra svizra è vegnida Nadine Fähndrich sco 24-avla. Da las passlungistas indigenas/engiadinaisas era Marina Kälin da San Murezzan la pli sperta. Ella terminescha la cursa da chasa en ils puncts sin plazza 24.
Main bain è quai i a la victura dal maraton da skis engiadinais Giuliana Werro da Zernez. Ella è vegnida 43-avla. Be in’emna suenter ch’ella ha stuì dar si durant la cursa a Les Rousses è quai dentant in pulit resultat.
Bilantscha positiva
L’Engiadina Ota es stat durant trais dis il Mecca dal sport da passlung. Per l’emprima giada dapi l’ediziun dal 2021 durant la pandemia da corona ha ins organisà cursas da la cuppa mundiala da passlung in Engiadin’Ota. Suenter tschintg cursas era cun plazzas da podest svizras tira il president dal comité d’organisaziun Menduri Kasper ina bilantscha positiva.
L’Engiadina Ota vegn a beneventar er dal 2027 e dal 2029 puspè l’elita dal sport da passlung. Lura han lieu las proximas cursas da la coppa mundiala in Engiadina.
