Nino Schurter, ma era Mathias Flückiger, han mussà ch’els èn pronts per ils gieus olimpics a Paris. Il Bernais ha mussà a la cursa da la cuppa mundiala da chasa a Crans-Montana sia meglra prestaziun da la stagiun ed è vegnì segund davos il grond dominatur e favurit Tom Pidcock. Flückiger (35 onns) ha uschia era dà in resposta sin sia selecziun dispitaivla per Paris. Gia a la fin da la segunda da set rundas era Mathias Flückiger avant Nino Schurter e sin ina plazza da podest. Ses avantatg sin Schurter è la finala creschì sin bun ina minuta.
Il podest dals umens:
- Thomas Pidcock (Gronda Britanna) 1:26:28 uras
- Mathias Flückiger (Svizra) +1:10 min.
- Luca Braidot (Italia) +2:05 min.
Il mountainbiker oriund da Tersnaus, ch'è era cupitgà duas giadas en questa cursa, ha la finala pers be piz a cup il sprint per il terz plaz encunter il Talian Luca Braidot ed uschia manchentà ses terz plaz da podest en questa stagiun. Perencunter è Schurter suenter las cursas da Crans-Montana il nov leader en il classament general da la cuppa mundiala. Il Lumnezian ha 942 puncts sin il conto, 144 dapli ch'il Sidafrican Alan Haterhly cun 798 puncts. Sin il terz plaz cun 795 puncts suonda il collega d'equipa da Schurter, il Tessinais Filippo Colombo.
Stuì magunar in'ulteriura terrada ha Vital Albin. Suenter ses bun resultat il di avant en il short track (22avel) ha el stuì sa cuntentar be cun il 57avel plaz en la cursa sur la distanza olimpica. Per Albin vali d'avair vinavant pazienza ed empruvar da far pass per pass enavant.
Ils resultats dals ulteriurs Svizzers:
4. Nino Schurter +2:08 min.
8. Lars Foster +3:07 min.
10. Filippo Colombo +3:22 min.
12. Luca Schätti +3:46 min.
17. Timon Rüegg +4:45 min.
19. Andri Frischknecht +5:13 min.
21. Joel Roth +5:29 min.
24. Marcel Guerrini +5:47 min.
28. Thomas Litscher +6:50 min.
57. Vital Albin +9:30 min.
77. Ursin Spescha +10:02 min.
Ina show da Tom Pidcock
Nagina schanza encunter Tom Pidcock. Il Brit ch'aveva gia gudagnà la cursa da la cuppa mundiala a Nove Mesto ha gia baud surpiglià la testa e curt suenter pudì sa distanziar da tuts. Pidcock ha uschia danovamain mussà tge fenomen ch'el è. Dacurt ha el terminà il Tour de Suisse sco 6avel dal classament general, uss brigliescha el sin il mountainbike ed en curt parta el al Tour de France. Silsuenter turna Pidcock lura enavos sin il mountainbike per defender a Paris ses titel da campiun olimpic.
Bleras cupitgadas e nauscha critica
Dasper Nino Schurter èn anc blers auters cupitgads sin il percurs pretensius da Crans-Montana, tranter auter era Tom Pidcock e Lars Foster. Cunzunt tar cundiziuns bletschas sco tar questa emprova generala han atletas ed atlets gì fadia cun quest percurs. Pliras passaschas n’èn strusch stadas pussiblas dad ir sin il mountainbike ed engiu, cunzunt sur il «Rock Garden», è il privel da cupitgar e sa blessar stà memia grond. En vista al campiunadi mundial il 2025 ston ils organisaturs uschia ir sur ils cudeschs e meglierar quest traject.
Tut en tut han radund 6'000 persunas visità las cursas a Crans-Montana sur tut ils trais dis da cursa. Quai n'èn betg gist fullas da fans, ma quai dovri er adina intgins onns enfin ch’ins haja il num en questa scena, uschia il tenor dals organisaturs. Betg giugà en las cartas ha dentant er la mal’aura en il Vallais. Al campiunadi mundial 2025 pon ins però franc quintar cun dapli glieud e cun dapli atmosfera.
Keller vegn er segunda en la cursa da cross country
La mountainbikera Alessandra Keller ha danovamain cuntanschì ina plazza da podest en la cuppa mundiala. Suenter il segund plaz en il short track a Crans-Montana è Keller era vegnida en la cursa da cross country segunda. Gudagnà questa cursa che vala sco l’emprova generala per il campiunadi mundial da l’onn proxim ha a moda suverana Loana Lecomte. La Franzosa ch’ha festivà en il Vallais sia 10avla victoria en la cuppa mundiala è stada bunamain ina minuta pli sperta che Keller. Cumplettà il podest sco terza ha l’Ollandaisa Puck Pieterse.
Persvadì a la cursa da chasa han era las Svizras Nicole Koller sco sisavla, Linda Indergand sco otgavla e Sina Frei sco novavla. Betg a la partenza è stada Jolanda Neff.
Chiara Solèr sut las top 30
Tar las dunnas sut 23 onns è Ginia Caluori da Panaduz vegnida 11avla, Chiara Solèr da Lumbrein 29avla ed Anina Hutter da Trimmis 33avla. Gudagnà la cursa ha la Franzosa Olivia Onesti.
Schurter manchenta podest en il short track
Ils mountainbikers svizzers han manchentà in plaz da podest en la cursa da short track a la cuppa mundiala da mountainbike da chasa a Crans-Montana en il Vallais, ma tuttina persvadì sco equipa. Nino Schurter è stà il meglier svizzer sco 6avel. Gist davos el en classads Filippo Colombo sco 7avel e Marcel Guerrini sco 8avel.
Plinavant è Lars Forster vegnì 11avel. Betg stà a la partenza è Matthias Flückiger che metta ses focus cumplainamain sin la cursa da cross country, er en vista als gieus olimpics a Paris.
Vital Albin sin via enavos
Persvadì a Crans-Montana ha er Vital Albin. Il Lumnezian che pattescha dapi il cumenzament da la stagiun da surtrenament è vegnì 22avel. Cun quest meglier resultat da la stagiun en la cuppa mundiala ha il mountainbiker da 25 onns mussà ch’el sa chatta sin la dretga via enavos. La finamira da las proximas emnas è d’anc pudair sa qualifitgar per il campiunadi mundial da quest onn la fin avust a Vallnord en l’Andorra. Per dumagnar questa qualificaziun dovri in plaz sut ils top 15, in resultat che tschintg svizzers han gia cuntanschì fin oz.
Tom Pidcock betg da franar
Ina classa per sasez en questa cursa da short track è stà il Brit Tom Pidcock. Malgrà ch’el è cupitgà en l’emprima runda e crudà enavos sin il davos plaz ha il grond favurit la finala triumfà a moda suverana. En la davosa runda n’è nagin pli vegnì da restar sin ils chaltgogns al campiun olimpic da Tokio. La finala ha Pidcock gudagnà avant il Tudestg Julian Schelb ed il Talian Luca Braidot.
Alessandra Keller vegn segunda en il short track
Quai che n’è betg reussì als umens è grategià a las dunnas, da procurar per in plaz da podest avant ils fans da chasa. Alessandra Keller è vegnida segunda ed ha ina gia dapli demonstrà ch’ella è actualmain cleramain la pli ferma svizra. Pli sperta che la mountainbikera dal chantun Sutsilvania è sulet stada l’Ollandaisa Puck Pieterse ch’ha pudì sa distanziar da l’entira concurrenza sin la davosa runda. Keller ha lura gudagnà il sprint per il segund plaz avant l’Ollandaisa Anne Tauber ch’è vegnida terza e la Franzosa Loana Lecomte sco quarta.
Ina buna cursa ha er mussà Seraina Leugger ch’è sco 12avla vegnida segunda meglra svizra. Linda Indergand è vegnida 18avla e Sina Frei 21avla. Betg stada a la partenza è Jolanda Neff ch’ha dà forfait per las cursas da chasa a Crans-Montana. Neff ha dacurt absolvì il Tour de Suisse e sa concentrescha uss sin sia terapia pervia da ses problems cun il flad, per uschia esser en top furma als gieus olimpics a Paris.
Chiara Solèr: «L'experientscha è pli impurtanta ch'il resultat»
Ina cursa tut speziala a Crans-Montana spetga er sin Chiara Solèr da Lumbrein. La giuvna da 19 onns parta dapi questa stagiun tar las dunnas sut 23 onns. Sia premiera ad ina cursa da la cuppa mundiala en questa categoria U23 ha ella festivà avant in’emna en Val di Sole nua che Chiara Solèr è vegnida 32avla. En questa stagiun vali per la giuvna lumneziana en emprima lingia da rimnar experientscha tar las U23. In top resultat na saja betg pussibel a Crans-Montana, er perquai ch’ella stoppia parter quasi il pli davos. Ma tuttina speria ella da pudair far ina pass enavant, da runda tar runda, uschia Chiara Solèr avant la cursa da cross-country.
Er a la partenza la dumengia a la cursa da cross country da las dunnas U23 èn dasper Chiara Solèr da Lumbrein, Ginia Caluori da Panaduz, Anina Hutter da Trimmis e Lorena Cadalbert da Cuira.
Gia la sonda è stada la cursa da cross country dals umens U23. Gudagnà ha l’American Riley Amos. Meglier svizzer è vegnì Dario Lillo sco 5avel. Janis Baumann dad Igis ha pers 7:20 minutas ed uschia stuì sa cuntentar cun il 30avel plaz.
Uschia vai vinavant
En duas emnas spetga gia la proxima cursa da la cuppa mundiala, quai a Les Gets en Frantscha. A questa cursa dals 7 da fanadur na parta Nino Schurter betg. El passenta il proxim temp en l'Engiadina per uschia trenar en l'autezza en vista als gieus olimpics a Paris. Las cursas olimpicas, il punct culminant da l'onn, èn ils 28 e 29 da fanadur.
Ina purschida per tut ils fans da mountainbike: rapports, contribuziuns e tips
