Cun in 8avel rang en la cursa da Cross-Country a Mont-Sainte-Anne en il Canada ha Nino Schurter terminà dumengia sia 18avla stagiun sco profi. La concurrenza en la provinza Quebec na vegn dentant betg ad esser stada l'ultima cursa da la cuppa mundiala da l'icona da mountainbike svizra. Schurter zappa numnadamain er l'onn che vegn en il pedal – ha el annunzià mardi.
«Dapi ch'il chalender da cursas è publitgà per l'onn 2025 èsi cler per mai: quai vegn ad esser la fin perfetga da mia carriera da cross-country», ha ditg Schurter. «In ulteriur campiunadi mundial a chasa e la cursa da la cuppa mundiala a Lai èn la partenza optimala per mai.» El haja anc adina plaschair dad ir cun mountainbike ed i fetschia er vinavant plaschair da lavurar dir vi da sasez, uschia Schurter.
Dals 30 d'avust fin ils 14 da settember vegnan organisads ils campiunadis mundials 2025 en il Vallais – las cursas da cross-country han lieu a Crans-Montana. L'emna suenter il campiunadi mundial stat sin il program la cuppa mundiala a Lai. Suenter stattan anc las duas cursas en ils Stadis Unids (Lake Placid) ed en il Canada (Mont-Sainte-Anne) en il chalender.
Gudagnà tut quai ch'i dat da gudagnar
Schurter è il mountainbiker cun il pli grond success en l’istorgia. A Paris è el sa participà quest onn a ses 5avels gieus olimpics. Cun aur a Rio 2016, argient a Londra 2012 e Bronz a Peking il 2008 posseda il sportist svizzer da l'onn 2018 in set da medaglias olimpicas cumplet. Dasperas è el 10dubel campiun mundial en il cross-country ed ha gudagnà il zercladur 2024 sia 36avla cursa en la cuppa mundiala, uschia ch'el ha extendì vinavant ses record.
A partir dal 2026 naginas cursas da la cuppa mundiala pli – persuenter autras concurrenzas
Che la stagiun 2025 vegn ad esser sia davosa en la cuppa mundiala, da quai na lascha Schurter nagin dubi: «Jau sent ch'i vegn plaunsieu temp. I vegn definitivamain ad esser la fin da mia carriera en la cuppa mundiala da cross-country.»
Tge vegn suenter? Ulteriuras operaziuns vegnan a suandar. «I dat blers cools events che jau participass anc gugent, per ils quals jau n'hai dentant mai gì temp durant la stagiun da la cuppa mundiala», uschia Schurter.
