Suenter trais victorias è rutta la seria da «Mister Bikemaraton dal Parc Naziunal» Urs Huber. El è er questa giada stà in dals cunfavurits. A la fin è Samuele Porro da l’Italia dentant stà pli ferm ch'il victur da record. Porro gudogna la cursa roiala da 141 kilometers. Tar las dunnas è Alessia Nay da Zezras stada la pli sperta.
Porro e Nay rumpan serias da Huber e Zürcher en il «vallader»
Samuele Porro era davent da l’entschatta a la testa da la cursa. Si vers il Pass Chaschauna ha el attatgà. El ch'è era gia stà a la partenza da cursas da la cuppa mundiala, e che ha gudagnà dacurt ina etappa dal Swiss Epic. Là ha el fatg la differenza, uschia che la concurrenza n'è betg pli stada abla da reagir. Urs Huber è vegni sco segund a Scuol en l’arrivada ed è stà cuntent cun ses resultat. El ha stuì sbatter l’emna passada cun in dafraid, uschia ch'i n'era betg pussibel dapli. Ina victoria da la partenza fin a l’arrivada ha er Alessia Nay da Zezras pudì mussar. Tar sia premiera al Bikemaraton dal Parc Naziunal ha er ella interrut la seria da trais victorias dad Alexandra Zürcher, ch’è vegnida segunda.
Tinetta Thanei-Strimer sin podest tar «jauer»
Tar la segund lunga cursa dal Bikemaraton da Fuldera a Scuol sur 107 kilometers ha quai gest dà in pèr plazzas da podest per ciclistas e ciclists indigens e rumantschs. Tinetta Thanei-Strimer da Scuol è vegnida segunda sin quest traject. La ciclista engiadinaisa era vegnida mamma il december passà ed ha mussà ina fitg buna prestaziun. Terza è vegnida in'ulteriura rumantscha – Ursina Condrau da Mustér. Pli svelta che Tinetta Thanei-Strimer ed Ursina Condrau è be stada Pia Vogt da la Germania.
Ed er tar ils umens ha quai dà ina plazza da podest rumantscha. Sascha Deplazes da Mustér è vegni terz sin questa distanza. Flurin Staub ha gudagnà la cursa sur 107 kilometers.
Letizia Strimer gudogna «Livignasco»
Ed era tar la cursa Livignasco sur 70 kilometers ha ina ciclista indigena pudì cumbatter per la victoria. Letizia Strimer, la sora da Tinetta Thanei-Strimer, ha gudagnà sco l’onn passà la cursa. Tar ils umens era Marcel Ender dal Principadi da Liechtenstein il pli spert.
Bilantscha positiva dal copresident Flurin Bezzola
Ils organisaturs èn cuntents cun il 23avel Bikemaraton dal Parc Naziunal Svizzer. Tut haja funcziunà sco previs, ha ditg il copresident Flurin Bezzola. I haja bain dà incaps, però nagins accidents pli gronds.
Las preparativas per la pli gronda cursa da mountainbike svizra
L’idea al principi da la cursa dal Bikemaraton dal Parc Naziunal era da promover ina tura da bike enturn il Parc Naziunal. Per far reclamar per questa sparta aveva la destinaziun turistica inventà la cursa da mountainbike. Spert ha la cursa da mountainbike dentant gì bler dapli success che la tura da velo uschia che quella è puspè svanida. Il Bikemaraton dal Parc Naziunal è dentant restà ed è uss passa ventg onns suenter sia premiera la pli gronda cursa da mountainbike da la Svizra.
Sper la cursa roiala da passa 140 kilometers da quai anc ulteriuras quatter cursas cun differentas lunghezzas.
Ils megliers onns passa 2’200 participants
Spert è il Bikemaraton dal Parc Naziunal creschì: Gia per la segunda ediziun l’onn 2003 eran annunziadas passa 1'000 ciclistas e ciclists. Ed uschia è la cursa Bikemaraton dal Parc Naziunal creschida d’in cuntin, entant ch'autras cursas han stuì cumbatter cun la sminuziun d'annunzias. Ils megliers onns han radund 2’200 ciclistas e ciclists fatg ina da las tschintg cursas en la regiun dal Parc Naziunal.
Retg Urs Huber e regina Alexandra Zürcher
Sur tut ils onns ch'il Bikemaraton dal Parc Naziunal exista è Urs Huber stà il sportist ch'ha procurà per las pli bleras victorias. Il mountainbiker dal chantun Turitg ha gia gudagnà set giadas il Bikemaraton dal Parc Naziunal – las davosas trais giadas en seria. El piglia quest onn pia la quarta victoria en seria en mira. Tar las dunnas dominescha Alexandra Zürcher la cursa: Gia trais giadas ha la ciclista dal chantun Berna gudagnà la cursa. Er ella prenda pia en mira la quarta victoria en seria quest onn.
Dus grischuns èn sa preparads
La preparaziun sin la cursa da quest onn era per Tinetta Thanei-Strimer da Scuol e per Gian Caviezel da Sent dal tuttafatg differenta – e quai malgrà che tuts dus fan part da la medema equipa. Tinetta Thanei-Strimer ha manchentà la cursa da l’onn passà perquai ch’ella era en speranza. Il december è ella alura vegnida per l’emprima giada mamma. La ciclista passiunada ha l'emprim stuì sa remetter da la gravidanza e da la pagliola. Pir avant paucs mais ha ella puspè pudì cumenzar cun il trenament. Quel è dentant stà tut auter che pli baud. Era sch'ella n’ha betg pudì trenar uschè bler sco auters onns è ella pronta per la cursa.
Tschintg variantas da la cursa:
- «Vallader»: 141 km e 3'848 meters d'autezza
- «Jauer»: 107 km e 2'754 meters d'autezza
- «Livignasco»: 70 km e 1'767 meters d'autezza
- «Putèr»: 47 km e 870 meters d'autezza
- «Zernezer»: 33 km e 435 meters d'autezza
Per uffants: «Kids Race» a Gurlaina ed il «Kids Parcour» en il Village
1'500 participantas e participants creschids, e var 250 uffants e giuvenils
82% umens e 18% dunnas
ca. 450 voluntarias e voluntaris
Categorias da licenza survegnan premis da raps, categorias da fun survegnan mintgamai in pocal da l'Uffizina Samedan
Defect sin ils ultims kilometers
Er Gian Caviezel da Scuol fa part al Biketeam dal Parc Naziunal. Auter che sia collega haja el pudì trenar tut normal. Sco Tinetta Thanei-Strimer è era Gian Caviezel in dals ferms indigens tar il Bikemaraton. La stagiun passada aveva Gian Caviezel gia la victoria davant ils egls. Cun in grond avantatg è el vegni da l’Engiadina engiu. Be in defect sin ils ultims kilometers han impedì ch'el avess gudagnà la cursa «Livignasco» davent da Livigno sur 70 kilometers fin a Scuol. Questa giada spera el che tut va bain e ch'el po mussar tge ch'el sa.
