La refurma da cassas da pensiun fiss vegnida acceptada sch'i fiss vegnì votà l'entschatta avust. 49% avessan ditg Gea, e 39% Na. In zic pli cler è il Gea a l'iniziativa da biodiversitad. 51% da las persunas dumandadas avessan ditg Gea, 43% Na. Quai mussa l'emprima retschertga en vista a las votaziuns da l'institut Gfs Berna.
Refurma da cassas da pensiuns ha grev stan
10% dapli persunas èn per la refurma da cassas da pensiuns ch'encunter. I dat dentant anc 12% da las persunas dumandadas, ch'han l'intent da votar e n'èn anc betg sa decididas – e quai sur l'entir spectrum politic.
Cunzunt en il center datti bler sustegn per la refurma. Tar la PPS, la PS e la Verda èn bleras persunas encunter.
In stretg Gea a la biodiversitad
Tenor l'enquista han 61% da las persunas gia decidì, tge ch'ellas voteschan. 6% sajan anc indecisas. Sche las persunas chattan che la Svizra fetschia gia avunda per la biodiversitad, èn ellas encunter l'iniziativa, uschiglio persuenter.
Ils arguments che pertutgan l'agricultura e la construcziun d'abitaziuns n'èn betg uschè decisivs per la decisiun da votar. Principal saja, sch'ins vesa in problem tar la biodiversitad. Malgrà il stretg avantatg per l'iniziativa, spetgan las persunas dentant che l'iniziativa na vegn betg approvada.
Sanestra per biodiversitad
Il pli impurtant per la decisiun da votar è tenor la retschertga, sch'ins vesa in problem tar la spariziun da spezias en Svizra. Quai, ensemen cun ils quitads per il maletg da la cuntrada, commova cunzunt la sanestra.
Tar la dretga è il sustegn pitschen, perquai ch'ella na vesa betg in problem tar la biodiversitad. E sco argument vegn là vitiers ch'i dettia consequenzas negativas per l'agricultura.
Las auturas ed ils auturs da l'enquista da Gfs Berna prevesan duas pussaivladads per il trend davart l'iniziativa. Perquai che bleras persunas chattan che problems da l'ambient vegnan adina pli urgents, pudess l'iniziativa mussar si che la biodiversitad saja in problem sut-schazegià. Da l'autra vart perdan iniziativas per regla sustegn durant il cumbat da votaziun.
Iniziativas perdan cul temp sustegn
Iniziativas dal pievel sco quella da biodiversitad perdan plitost sustegn cun il temp, perquai che las aderentas ed ils aderents vesian l'entschatta plitost las schanzas, lura vegnian dentant la fin debattadas pli fitg las varts negativas.
Tar la refurma da cassas da pensiun spetga GFS Berna anc moviment. I pudess vegnir stretg. Las persunas indecisas vegnian probabel influenzadas da las grondas campagnas da votaziuns che cumenzan pir anc.
Bler intschertadad tar la refurma
In dals arguments che tschiffan il pli fitg per approvar la refurma è che persunas che lavuran parzialmain duain avair ina pli ferma segunda pitga. Er l'argument che persunas pli veglias han da pajar main contribuziuns tschiffa. L'argument che persvada las pli bleras aderentas è che la tariffa da conversiun na dastgia esser memia auta, per che las persunas cun activitad da gudogn na ston betg cumpensar per las rusnas en las cassas.
L'argument ch'è il pli ferm encunter è che la refurma saja ina cugliunaria e che lavurantas e lavurants ston pajar dapli e survegnian lura pli pauc. Ed er bleras e blers chattan ch'i na saja betg supportabel da sbassar las rentas da la segunda pitga en vista da l'inflaziun ed ils auts tschains.
