Il Grischun desista da trair vinavant la decisiun dal Tribunal administrativ federal d'interrumper la regulaziun proactiva da quatter trieps da lufs. Ins na vegnia betg a trair vinavant la decisiun al Tribunal federal, ha ditg la cussegliera guvernativa Carmelia Maissen sin dumonda da RTR.
Cunquai che la perioda da regulaziun cuzzia be anc 20 dis na rendia quai betg ord raschuns da temp.
L’emna passada aveva il Tribunal administrativ federal decis che la regulaziun proactiva sin quatter trieps da lufs en il Grischun resta interrutta. Las organisaziun per la protecziun da la natira avevan fatg recurs cunter la lubientscha da regular ils trieps da Stagias, Vorab, Rügiul e Jatzhorn.
I na dess nagina via enavos
Pervi da recurs da pliras organisaziuns per la protecziun da la natira aveva il Tribunal administrativ federal sistì la lubientscha da sajettar ils lufs per il temp da la procedura. L'uffizi ed ils chantuns han dumandà d'abolir l'uschenumnà effect suspensiv. Per quai avessan els da mussar ch'i dettia in dischavantatg remartgabel pervi da l'effect suspensiv.
Tenor las actas na sajan ils lufs en il Grischun dentant betg sa spezialisads sin stgarps d'animals da niz sch'igl haja mesiras da protecziun per la muaglia. Da l'autra vart na sa lascha i betg pli midar, sch'ils lufs fissan gia sajettads, l'effect fiss irreversibel.
Areguard ils interess e la commensurabladad è la dretgira vegnida a la conclusiun ch'i saja da mantegnair il stop da sajettar ils lufs respectivs.
Cuntent cun la decisiun dal tribunal
Cun il stop vegni evità che lufs vegnan sajettads che na dastgan vegnir sajettads tenor lescha, dian las organisaziuns ch'han inoltrà il recurs– grazia a la decisiun dal tribunal – evitar che lufs vegnian sajettads che na dastgassan tenor lescha betg vegnir sajettads.
Ins haja ponderà bain tge lubientschas ch'ins contestia, scriva la Pro Natura. Pertutgadas sajan mo lubientschas nua ch'ins haja quintà cun problems tar la legalitad e tar il princip da la proporziunalitad. Pia èn las organisaziuns che l'effect suspensiv resta valaivel.
Il chantun è dischillus
Il chantun ha sperà da pudair cuntinuar sco planisà il november. Quai na saja uss betg il cas ed els sajan dischillus e betg cuntents cun la decisiun, di Arno Puorger, responsabel per animals da rapina gronds tar l'Uffizi chantunal da chatscha e pestga.
La decisiun dad ussa pertutgia dentant be l'effect suspensiv. Il Tribunal administrativ federal stoppia anc decider sche las regulaziuns sajan legalas u betg.
Recurs cunter lubientscha da BAFU
Oriundamain aveva il BAFU approvà da sajettar 12 trieps cumplets suenter avair examinà las dumondas dal Grischun e dal Vallais. Mo la dumonda dal chantun Tessin da sajettar giu l'entir triep en la Val d'Onsernone era vegnida refusada.
Las organisaziuns recurrentas Pro Natura, WWF, BirdLife e la Gruppa Luf Svizra èn da l’avis che la Confederaziun ed ils chantuns na respectian betg il «princip da la commensurabladad e la rolla impurtanta che l’animal da rapina gioga en il sistem ecologic da guaud». Els avevan inoltrà al Tribunal administrativ federal dus recurs cunter intginas da las permissiuns concedidas da l’Uffizi federal d’ambient.
Or da l'archiv: