Il settember è vegnì preschentà in sboz da la ordinaziun da chatscha che duess ir en vigur il december 2023. Er entirs trieps duain pudair vegnir sittads a moda preventiva stat, per exempel, en quest sboz. La cussegliera guvernativa Carmelia Maissen ha ditg ch'i spetgan ch'il Cussegl federal decida il cumenzament november a moda definitiva davart l'ordinaziun. Davart cifras quants lufs u trieps ch'i vegn sajettà en il Grischun n'ha la cussegliera guvernativa dentant anc betg vulì discurrer.
I vegn quintà cun bler traffic durant gieus olimpics d'enviern
Ils gieus olimpics d’enviern 2026 a Milano-Cortina en l'Italia vegnan ad accentuar la situaziun da traffic en il Grischun, spezialmain en las valladas dal sid. Per ir tar las occurenzas a Livigno u a Bormio saja da quintar che blers fans da sport da la Svizra dentant era dad autras terras vegnian a prender la ruta tras il Grischun per vegnir en l’Italia. Quai ha la cussegliera guvernativa, Carmelia Maissen ditg en il rom da l'ura da dumondas en il Cussegl grond.
Las bleras colliaziuns dal Grischun a Livigno mainan sur pass e tar mal’aura saja perquai da quintar ch’ins stoppia era serrar vias. Perquai è il chantun dapi plirs mais gia en contact cun ils responsabels per far in concept da traffic durant quest temp. La finamira saja d'avair in’emprim concept provisoric il december 2023.
Laschar custar dapli la furmaziun professiunala
Definir e realisar mesiras per rinforzar la furmaziun professiunala en tut ils secturs e sin tut ils stgalims. Quai pretenda il Cussegl grond da la regenza.
El ha approvà unanimamain in’incumbensa dal deputà dal Center Jürg Heini. En pli duai la regenza augmentar la finanziaziun da la furmaziun professiunala; lezza era sa dustada cunter quai punct. Per l’ina haja il Cussegl grond la suveranitad sur dal preventiv e decidì uschia sur dals meds finanzials. Per l’autra veglia la regenza spetgar giu differentas revisiuns en connex cun la furmaziun, avant che decider davart ils daners. A la fin ha la versiun originala fatg la cursa.
Il Cussegl grond ha surdà a la regenza in’incumbensa che duess auzar las contribuziuns a las uniuns da sport dal Grischun or da la lottaria naziunala. Quai cun 119 encunter 0 vuschs.
Actualmain survegnan las 44 uniuns da sport radund in milliun francs per la promoziun dal sport. Entant che las entradas da la lottaria naziunala per il chantun èn creschidas ils ultims 10 onns, èn las contribuziuns per las uniuns da sport stadas medemas il ultims onns.
Ademplir ils basegns d'uffants cun impediments
Uffants cun impediment duain a tut temp avair ina purschida che correspunda als basegns da la pedagogia speziala. Il Cussegl grond ha approvà ina incumbensa correspundenta.
Plinavant sto il chantun garantir ch’uffants e giuvenils cun impediments survegnan sche necessari in plaz en in’instituziun da la scola speziala; e quai sche pussaivel entaifer in quartal. Era duai la regenza elavurar ina lescha per indemnisar las scolas, che quellas prendian mesiras per surmuntar il temp da spetga fin ch’ils uffants survegnan in plaz en la scola speziala.
Dumondas da bajegiar duain vegnir tractadas pli svelt
La regenza sto examinar co ch'ins pudess far ir pli spert proceduras da bajegiar che cuzzan savens blers onns. Il Cussegl grond ha surdà ad ella questa incumbensa cun 98 encunter 17 vuschs. La regenza aveva proponì da refusar l’incumbensa da la cumissiun d’ambient, traffic ed energia. Tranter auter ha ella argumentà ch’i saja lià ils mauns al chantun pervia dal dretg federal.
Gist quai è vegnì crititgà fermamain dal parlament e quai ord tuttas fracziuns.
Decidì davart criminalitad da drogas
Tar la dumonda da co far frunt a la criminalitad da drogas aveva in'incumbensa or da retschas da la PPS pretendì che la regenza prendia ulteriuras mesiras per cumbatter questa criminalitad. A la fin ha la cuntraproposta da la regenza fatg la cursa: examinar ulteriuras mesiras da repressiun, però betg sin donn a cust da las autras mesiras da prevenziun. Quai cun 92 cunter 25 vuschs.
Indemnisaziun per spendreras
Il chantun duai far dapli per garantir l’access als servetschs da spendreras che pratitgeschan libramain en il Grischun. E quai era per tut las famiglias en tuttas regiuns; independent da la situaziun finanziala. Per exempel entras ina indemnisaziun da pichet chantunala. Il Cussegl grond ha approvà mardi ina incumbensa dal socialdemocrat Patrick Degiacomi cun 100 cunter 16 vuschs.
