Il suveran svizzer decida probablamain davart la lescha federala davart il provediment segir cun energias regenerablas, l'uschenumnà «decret da mantel d'energia». Il comité da referendum ha inoltrà il referendum cun 63'184 suttascripziuns – tenor atgnas indicaziuns. Per ch'i vegnia ad ina votaziun a l'urna dovri almain 50'000 suttastricziuns valaivlas.
Cumenzà a rimnar suttascripziuns aveva ina pitschna gruppaziun a Neuchâtel. Pli tard èn s'associadas la Federaziun cuntrada libra Svizra e la Fondation Franz Weber. La lescha cuntegnia bain aspects positivs che dettian schlantsch a la midada energetica, però sin donn e cust da la protecziun da natira e cuntrada, argumentescha il comité da referendum. I na fetschia nagin senn da per exempel runcar guauds per bajegiar parcs da vent per promover energias regenerablas. Il decret saja vegnì decidì a la bahutta.
L'atun passà aveva il parlament tractà ed approvà cleramain il decret: Il Cussegl naziunal cun 177 cunter 19 vuschs ed il Cussegl dals chantuns cun 44 vuschs senza cuntravusch. Sper il parlament e la maioritad da las partidas èn era pliras organisaziuns per la protecziun da l'ambient per il decret – tranter auter il WWF, Greenpeace ubain era la Fundaziun svizra per energia.
