La Svizra stoppia producir dapli electricitad. Qua na dettia nagin’alternativa, di Roland Leuenberger. Quai che fa dentant gronds quitads al CEO da la Repower è ch’i na giaja betg propi vinavant. «Las lubientschas e la construcziun dals implants electrics van memia plaun e da l’autra vart n’essan nus era cun l’engrondiment da la rait betg là, nua che nus duessan esser.»
80 mia. investiziuns enfin 2050
E gist la rait d'electricitad saja il mument anc memia pauc tema en las discussiuns enturn la midada d'energia. Tenor in studi da la Scola politecnica federala da Turitg e da l'Uniun da las ovras electricas svizras che vegn publitgà questa primavaira dovri investiziuns da radund 80 milliardas francs enfin il 2050.
«Quai è mintg’onn circa 2,5 milliardas. Il mument faschain nus mo circa la mesadad da quai. Nus avain pia gia retard. E quai è summas immensas che nus stuain pajar.» La gronda part dals daners giajan en la rait da tensiun bassa, quella che porta l'electricitad en chasa. Oz saja ina chasa forsa colliada cun 7'000 watt. Cun quai possian ins cuschinar, lavar resti, far cun il tschitschapulvra – quai ch'ins dovri en il mintgadi.
«Ed en l'avegnir avain anc indriz da fotovoltaica, quai che munta en ina chasa dad ina famiglia anc ina giada 10’000 watt. E lura ina staziun da chargiar che munta anc ina giada 11’000 watt, ed ina pumpa da chalur, anc ina giada intgins millis watt. A la fin summa quai a tranter 35’000 e 40’000 watt. Quai munta enstagl d'in cabel satigl in cabel gross. E quai munta stgarpar si il palantschieu.»
Possessurs d'indriz fotovoltaics pajan damain, dovran però dapli
E pajar quellas investiziuns stoppian ils consuments via il pretsch d'electricitad. Sper l'electricitad sco tala pajain nus numnadamain era ina tariffa per il diever da la rait. Mo qua dettia in segund problem che vegnia anc a s'accentuar ils proxims onns, di Leuenberger.
Possessurs dad indrizs fotovoltaics sajan quels clients che dovrian ina rait pli ferma. Quai per furnir lur electricitad solara viaden en la rait. Il medem mument retirian els dentant pli pauc electricitad e pajan uschia era pli pauc vid ils custs da la rait d'electricitad. Quai na saja betg gist, di Roland Leuenberger.
Ils custs per la rait restan tuttina, ma vegnan repartids sin pli paucs clients. Questa tematica stuain nus discutar. Oz pajain nus tenor uras kilowatt e nus stuain transfurmar quai en ina tariffa da prestaziun – tut tenor, quant che jau vi furnir en la rait ubain retrair. Auter n’è quai betg pussaivel.
Tschella via fiss da limitar la quantitad d'electricitad ch'in possessur dad in indriz fotovoltaic po furnir en la rait. Lura na stoppian quellas betg vegnir rinforzadas uschè ferm. Mo en vista al fatg che nus duvrain dapli electricitad en l'avegnir na saja quai betg ina buna schliaziun, manegia il CEO da Repower.
