Mesnemna ha il Cussegl federal approvà las adattaziuns da l’ordinaziun da chatscha, quella prevesa che lufs possian era vegnir sajettads a moda preventiva.
Las organisaziuns d'ambient prendan posiziun ensemen. L'ordinaziun na saja betg en proporziun, betg fundada e stoppia vegnir curregida en la consultaziun spustada il 2024. La convivenza cun il luf saja strapatschanta, dentant pussaivla, scrivan WWF Svizra, Pro Natura, Birdlife Svizra e la Gruppa Luf Svizra. Quai mussian las cifras da la davosa stad.
Il parlament ha fatg ina buna lavur e resguardà tut ils interess. Ch’il Cussegl federal ignorescha quai ch'il parlament ha discutà e vulì è en sasez in scandal.
La critica da las organisaziuns tutga cunzunt il dumber minimal da trieps da 12 trieps. Quest dumber saja cumplettamain arbitrars, e na sa basia betg sin ponderaziuns scientificas da protecziun da spezias. Questa opiniun dettia er en la selvicultura. David Gerke, manader da la gruppa Luf Svizra, di che l'ordinaziun na resguardia betg ses potenzial per donns effectiv. Vinavant na correspundia l'ordinaziun betg a la lescha vertenta.
Tuttina possian mesiras precisas e sveltas cunter trieps chaschunar in digren da stgarps. Perquai pretenda el in agir dals chantuns en proporziun, equilibrà e cun cumpetenza da fatgs.
Basegn d'agir enorm per auters
Il basegn d'agir saja enorm, di la Gruppa svizra per las regiuns da muntogna SAB. La populaziun da lufs en Svizra saja sa sviluppada a moda exponenziala. Ditg saja la politica federala stada bloccada. Intginas puras e purs hajan gia smess, u betg pli chargià las alps u stgargià ellas pli baud. Sendas da viagiar han stuì vegnir serradas pervia da chauns da protecziun.
Quels conflicts cun turissem ed agricultura dettia pli savens cun la creschientscha da la populaziun da lufs. Perquai pretenda la SAB ina reducziun da la populaziun da lufs anc en l'enviern 2023/2024, e beneventa la nova ordinaziun.
