Igl èn cifras che dattan en egl cun studegiar il rapport da quartal da l'Uffizi da chatscha e pestga dal chantun Grischun. Il dumber d'animals da niz stgarpads è quest onn sa reducì quasi per la mesadad, cumpareglià cun l'onn passà. Da bunamain 520 stgarps il 2022, sin actualmain 264 stgarps per il 2023.
Tenor Arno Puorger da l'Uffizi da chatscha e pestga dettia differents motivs per questa diminuziun. Per exempel hajan ins fatg l'atun passà tschertas regulaziuns da lufs, che hajan segir gì in effect. Da menziunar saja qua il triep da Beverin nua ch'il bab-luf saja vegnì sajettà. Betg in soli stgarp haja dà il 2023 en la regiun dal triep da Beverin fin qua.
Las attatgas sin muvel grond u er sin asens èn idas enavos sin null la stad passada en la regiun dal triep da Beverin.
Plinavant menziuna Arno Puorger era che la protecziun dals animals da niz saja vegnida pli optimala. Ins s'accorschia ch'ils purs e las puras hajan fatg lur lavur en quest connex.
Nursas e chauras vegnan stgarpadas
La nova statistica da l'Uffizi da chatscha e pestga mussa er cleramain, ch'ils lufs en il Grischun han il 2023 per gronda part stgarpà nursas e chauras. Dals 264 animals da niz stgarpads fin qua, èn 262 stads nursas u chauras. Vitiers èn dus animals da niz gronds vegnids stgarpads.
