La cumissiun parlamentara d’inquisiziun PUK ha dapi il zercladur 2023 intercurì la finiziun da la Credit Suisse. Da questa cumissiun han fatg part set persunas dal Cussegl naziunal e set persunas dal Cussegl dals chantuns. La cumissiun ha interrogà 79 persunas. Tgi che questas persunas èn, è in secret da cumissiun. Durant 45 sesidas ha la PUK examinà 30'000 paginas. Avant ch’il rapport è stà sin maisa è vegnì speculà – ch’il minister e la ministra da finanzas, Ueli Maurer e Karin Keller-Sutter, sajan vegnids dumandads. Ed era persunas ch’eran a la testa da la Banca naziunala svizra e da la FINMA, la Surveglianza federala dals martgads da finanzas.
La PUK ha partì si la lavur en quatter fasas:
- L'emprima da l'onn 2015 fin la stad 2022, nua che la PUK ha examinà la gestiun avant la crisa.
- La segunda fasa da l'atun 2022 fin al cumenzament da mars 2023, cura che la crisa ha cumenzà.
- La terza fasa ha cumpiglià la crisa acuta dals 15 fin ils 19 da mars.
- E la quarta fasa cumpiglia la realisaziun da la fusiun da las duas bancas.
Mancanzas tar la FINMA
La cumissiun parlamentara d'inquisiziun taxescha il nausch management da la CS durant blers onns sco motiv per la crisa. Pertutgant la Surveglianza federala dals martgads da finanzas FINMA vesa la PUK critic, che quella ha lubì ina facilitad d’agen chapital a la CS. Vul dir che la banca ha pudì sbassar ils agens meds.
Tar la FINMA ha la cumissiun constatà che la lavur da la FINMA da survegliar è succedida intensivamain. Dentant na haja questa lavur betg adina mussà effects. La FINMA haja fatg attent ed admonì la Credit Suisse pliras giadas – e tuttina ha la banca lavurà vinavant sco fin qua. La PUK deplorescha retrospectivamain che la FINMA n'haja betg retratg la garanzia (Gewährsentzug). Ina persuna ha tras sia savida la garanzia da manar ina banca, questa avess duì vegnir retratga. En la lescha da la FINMA hai num: «La FINMA po relaschar persunas che n'adempleschan betg pli la garanzia per in'activitad commerziala excellenta».
Autoritads n'han betg discurrì avunda ina cun l'autra
La cumissiun che ha fatg il rapport crititgescha era che la regulaziun da «Too-big-to-fail» è vegnida sviluppada en moda tardivanta, ed en general che la communicaziun è stada insuffizienta tranter las autoritads. Dentant na vesa la PUK nagin cumportament sbaglià causal da las autoritads per la crisa da la CS. Cuntrari vesa la cumissiun che las autoritads han impedì en mars 2023 ina crisa da finanzas globala.
Durant la segunda fasa è la situaziun economica da la Credit Suisse sa pegiurada, scriva la cumissiun parlamentara d'inquisiziun en il rapport. Il cumenzament d'october fin il december 2022 ha la banca registrà perditas da liquiditad ed è stada curt avant l'insolvenza – pia che la CS n'era betg pli buna da pajar. Tras quai eran las autoritads a partir da l'october en il modus da crisa. La cumissiun crititgescha che betg tut las autoritads involvidas avevan il medem stadi da savida en questa fasa. En spezial l'infurmaziun dal Cussegl federal l'atun n'haja betg satisfatg. Da quest temp era Ueli Maurer en uffizi sco minister da finanzas.
En ils ultims dis da la Credit Suisse eran las tractativas tranter la CS e la UBS stentusas e difficilas, stat en il rapport. Las autoritads, surtut la ministra da finanzas Karin Keller-Sutter, han da quest temp persequità differentas opziuns:
- La sanaziun da la Credit Suisse
- Ina surpigliada a curta vista tras il stadi
- Sco ultima ratio ina fusiun sfurzada
Tgenina da questas soluziuns che fiss vegnida realisada, sche la fusiun d’urgenza na fiss betg gartegiada, n'è betg clar.
La PUK vegn a la conclusiun che l'applicaziun dal dretg d'urgenza è succedida legalmain. En vista a la situaziun acuta èsi chapaivel per la PUK ch'ina soluziun alternativa cun ina banca estra n'era betg pli realisabla quest mument. Er sche quella soluziun avess a lunga vista gì dapli avantatgs per la situaziun da concurrenza en Svizra.
La cumissiun renconuscha las prestaziuns da las autoritads dal mars 2023 che han impedì ina crisa finanziala globala. Or da ses punct da vista ston ins dentant emprender or da questa crisa da la CS, perquai ch'il stadi ha stuì impedir gia per la segunda giada l'andament d'ina banca ch'è relevanta per il sistem. Ed uss ha la Svizra mo pli ina banca ch'è relevanta per il sistem global.
Banca naziunala svizra che ha manà liquiditad
Fin l’onn 2020 ha la Banca naziunala svizra valità las duas grondas bancas svizras, la UBS e la CS, sco bain structuradas e prontas per la sfida da la pandemia da Covid. Pir en l'emprim quartal dal 2021 hai alura gì num, che la CS haja gì grondas sperditas suenter in scandal. Uschia èsi alura ì vinavant per la CS, entant che la UBS ha adina fatg dapli gudogn. En quest mument ha la Banca naziunala svizra pia realisà la situaziun da la CS, e ha era discutà quai cun la FINMA – dentant senza decider mesiras concretas per la banca. Ed il gremi per crisas finanzialas n'è betg vegnì infurmà.
L’incumbensa da la Banca naziunala svizra è da metter a disposiziun liquiditad a bancas che han difficultads. Uschia contribuescha ella tar la stabilitad dal sistem da finanzas. La Banca naziunala sto dentant controllar regularmain las segirtads da questas bancas. Las persunas ch’èn vegnidas dumandadas da la cumissiun parlamentara d'inquisiziun èn d’accord, che senza l’agid da la Banca naziunala fiss la CS gia stada insolventa il venderdi, ils 17 da mars – e betg pir dus dis pli tard, la dumengia ils 19 da mars. Il mars 2023 ha la Banca naziunala dà sur 88 milliardas francs agid a la CS – quai n'ha dentant betg bastà. Quai haja da far cun il fatg che la Banca naziunala svizra na po betg prescriver mesiras a bancas cun gronda relevanza per il sistem sco la CS. La cumissiun ch'aveva examinà la lavur da la Banca naziunala svizra na po betg respunder la dumonda, sche la banca dat ora memia restrictiv questas segiranzas.
In sguard sin ils tschintg dis avant che la Credit Suisse è ida a fund:
Mesemna ils 15 da mars:
Ils 15 da mars 2023 resulta in schlop, la banca stat davant la fin. La cussegliera federala Karin Keller-Sutter inscuntra a la zuppada la testa da la UBS a Turitg. I vala d'evitar ina crisa finanziala smanatschanta. Gia quest di era la fin da la CS quasi sigillada – la direcziun per ina surpigliada tras la UBS vegn messa. Da quai na san ni la publicitad ni ils collavuraturs da la CS. Ma la confidenza en la banca dat ensemen – la Banca naziunala svizra e la FINMA emprovan da calmar.
Gievgia ils 16 da mars:
La Credit Suisse sto dar access a cifras internas a sia pli gronda concurrenta, la UBS. Ina banca gronda svizra examinescha l'autra. Tar la cussegliera federala Karin Keller-Sutter èn ils fils chauds: ella telefonescha cun l'elita finanziala internaziunala che tema ina crisa da bancas globala. La notg dumonda la CS da la Banca naziunala svizra 50 milliardas francs per rinforzar sia liquiditad.
Venderdi ils 17 da mars:
Il temp è stgars, i dat mo ina finamira: salvar la Credit Suisse en la fin d’emna. Persuenter vegn la Banca naziunala svizra a ses cunfins e tegna en vita la banca gronda cun squittas finanzialas. Ella sa basa sin dretg d’urgenza. La luna tar ils emploiads da la CS sa reducescha parallelamain al curs da las aczias. Senza agid d'urgenza fiss la CS schon ida sut il venderdi suentermezdi, di la cussegliera federala Karin Keller-Sutter retrospectiv. E lura, curt suenter che la bursa è serrada il venderdi, annunzia la gasetta britannica «Financial Times»: La UBS duai surpigliar la CS.
Sonda ils 18 da mars:
Quant custa ina banca gronda en las stretgas? Ina milliarda francs duai il schef da l'UBS Colm Kelleher avair proponì al president da la CS Axel Lehmann. En il departament da finanzas vegn lavurà durant 24 uras tranter stgatlas da pizza e cuvertas militaras.
Dumengia ils 19 da mars:
Las ultimas uras da la banca gronda entschaivan. Per l'emprima giada sa scuntran la dumengia ils schefs da las duas bancas persunalmain. En il Departament da finanzas vegnan duvrads corridors secrets per esser protegids dad egliadas mirvegliusas. Avant la conferenza da medias istorica vegnan las tractativas tar il punct culminant. La cussegliera federala Karin Keller-Sutter vegn malpazienta per in tschert temp ed insista da chattar ina soluziun, ma per quai ston ils cussegls administrativs da la CS e da la UBS dar lur consentiment. E la saira hai num tranter ils emploiads da la CS: «Ils cubs èn crudads.» Dumengia, ils 19 da mars, 19:28, vegn communitgada la fin da la Credit Suisse.
