La PUK davart l'act da la UBS da surprender il CS ha gì si'emprima sesida e preschentà ses plans. Aifer ils proxims 12 fin 15 mais vul la cumissiun d'inquisiziun parlamentara preschentar ses rapport final. En si'emprima sesida haja la PUK sclerì la basa legala, e saja sa fatschentada cun las preparativas da la cumissiun da gestiun federala, ha infurmà la presidenta da la PUK, la cussegliera dals chantuns friburgaisa Isabelle Chassot.
Las vairas inquisiziuns cumenzian lura l'atun che vegn. Tgi che sto dar infurmaziuns, tge ch'ella chatta e tge documents ch'ella dovra vegn pir enconuschent cun il rapport final. I na saja betg previs da communitgar bilantschas intermediaras.
L'incumbensa è dad examinar la surpigliada d'urgenza dal CS tras la UBS. Sper la surpigliada duain era ils onns avant la surpigliada vegnir examinads, però era la lavur da la Surveglianza federala dals martgads da finanzas (Finma) e la rolla dal Cussegl federal e l'administraziun federala vegnan sut la marella.
