L'iniziativa da responsabladad per l'ambient pretenda che la Svizra engrevgescha l'ambient mo uschè fitg sco quai che la natira po sa regenerar. Quai per mantegnair e salvar la basa da viver per in e scadin. Las mesiras che la Confederaziun ha gia introducì han bain manà ad ina meglieraziun, uschia che las consequenzas negativas èn main fermas ch'avant 20 onns. Tuttina vegnia la basa da viver – sco l'aua, il terren e l'aria – anc strapatschada uschè ferm ch'ella na po betg sa revegnir pli.
L'economia duai reducir diever da resursas ed immissiuns
Las activitads economicas en la Svizra duain consumar mo tant da las resursas sco quai che la natira vegn da regenerar – pia mo in quantum che garantescha anc che la basa da viver natirala vegn salvada. Il medem vala era per immissiuns da substanzas nuschaivlas sco per exempel il dioxid carbonic (CO₂). La limita duai esser il quantum che la Svizra po consumar ed emetter proporziunalmain che na surpassa betg ils uschenumnads «cunfins planetars» che defineschan il cunfin da las chargias ch'il sistem ecologic da la terra po supportar.
Las mesiras deducidas da las pretensiuns da l'iniziativa duain però esser dal gener ch'ellas chaschunan uschè paucas consequenzas negativas sco pussaivel per la societad.
Arguments per e cunter l'iniziativa dal pievel
L'iniziativa vul far frunt a las consequenzas da la midada dal clima e la crisa da l'ambient, din ils iniziants.
Per il Cussegl federal ed il parlament èn las consequenzas negativas da l'iniziativa però memia grondas. Betg mo perquai che l'iniziativa pretenda da realisar las finamiras aifer mo 10 onns.
Cussegl federal e parlament recumondan in na a l'iniziativa dal pievel da responsabladad per l'ambient. En il Cussegl naziunal cun 133 cunter 61, ed en il Cussegl dals chantuns cun 31 na vers 11 gea.
Las partidas politicas èn divididas per lung las posiziuns tradiziunalas: Dretg-burgais recumonda in na, sanester-verd recumonda in gea.
