Sch'i fiss vegnì votà gia ils 18 da schaner 2025, fiss l'iniziativa per la responsabladad per l'ambient vegnida refusada d'ina clera maioritad. La part Na a l'iniziativa è s'augmentada sur l'andament da la campagna, entant che la cumpart en favur dal Gea è sa reducida. In tal trend vers Na correspunda tar in'iniziativa al cas normal da la furmaziun da l'opiniun.
Cumpareglià cun l'emprim barometer dal december è la cumpart da las votantas e dals votants che vulan dir Na a l'iniziativa dals Giuvens Verds creschida per 12 puncts procentuals sin 61%. Il medem mument sustegnan be pli 37% l'iniziativa, in minus dad otg puncts procentuals.
Las partidas
Il muster da conflicts da l’iniziativa è in maletg enconuschent tar iniziativas da la politica da l’ambient: ils aderents dals Verds, da la Partida socialdemocratica e da la Partida verd-liberala sustegnan cleramain, las autras partidas la refuseschan gist uschè cleramain. La polarisaziun da la politica da partidas resta ferma: Ils Verds (97% Gea) e la Partida liberaldemocratica (93% Na) sa mussan sco pols da la polarisaziun. Era las persunas che na sustegnan nagina partida han midà dad intenziun equilibrada ad ina clera posiziun da Na (65%).
Il conflict da basa-elita en ils conturns da la PVL resta: Entant che la testa da la partida ha formulà ina parola Na cunter l'iniziativa, resta la basa per entant per la gronda part persuenter. La versiun tardiva da las parolas da la PVL pudess però anc accelerar il trend da Na a la basa e far balluccar las relaziuns actualas da maioritad.
Per tge vai?
L’iniziativa da responsabladad per l’ambient pretenda che la Svizra engrevgeschia l’ambient mo uschè fitg sco quai che la natira indigena po era sa regenerar. Quai per mantegnair la basa da viver per fauna e flora. Mesiras necessarias per cuntanscher questa finamira na duaian betg engrevgiar suplementarmain las chasadas cun entradas bassas, ed interpresas pitschnas e mesaunas duain survegnir sustegn tar la transfurmaziun.
Tendenza a Na malgrà sustegn tar il cuntegn
Areguard il cuntegn chatta l'iniziativa per la responsabladad per l'ambient vinavant il consentiment oravant tut tar il schanetg da las resursas (60% èn d'accord) e tar la responsabladad per donns ecologics a l'exteriur (57%). Era la pretensiun da chattar ina rolla internaziunala da pionier sustegna ina considerabla minoritad (47%).
Tut ils arguments per èn dentant vegnids sut squitsch en il decurs dal cumbat da votaziun, il pli cleramain quel davart la rolla internaziunala. Arguments cunter han percunter gudagnà forza da persvasiun: 69% considereschan l'augment dals custs da viver e lur cuntradicziun a la cumpatibilitad sociala pretendida sco problematic. Ulteriurs 68% teman ristgas economicas tras las regulaziuns, e 67% crititgeschan restricziuns massivas dal standard da viver.