Radund set emnas avant la dumengia da votaziun è l'atmosfera per l'iniziativa da responsabladad per l'ambient criva. Ina maioritad relativa da 49% da las dumandadas e dals dumandads è segir u plitost cunter l'iniziativa ch'ils Giuvens Verds han inoltrà cun il sustegn da la Verda, ils Socialdemocrats, il Giuvens Socialists ed organisaziuns per la protecziun da l'ambient – ed ina minoritad relativa da 45% segir u plitost persuenter. Ils ultims 6% èn anc indecis. Quai resulta da l'emprima retschertga da l'institut gfs per la SSR. Uschia va l'iniziativa cun in dischavantatg da 4% en la fasa principala da la campagna da votaziun.
Iniziativa che polarisescha
La situaziun tar las partidas para tant sco clera. Entant ch'ils Verds, la Partida socialdemocratica (PS) e la Partida verd-liberala (PVL) èn cler per l'iniziativa, èn las ulteriuras partidas sumegliant cler encunter. La polarisaziun è auta cun l'acclamaziun da 98% tar ils Verds, e l'opposiziun clera da 81% da la Partida populara Svizra (PPS). Tar las persunas senza partida èn blers anc indecis, uschia che las opiniuns n'èn betg anc fatgas.
Gea din dapli dunnas, dapli giuvens e las regiuns latinas
En egl dat tar questa retschertga in gronda differenza tranter umens e dunnas. Entant che 56% da las dunnas schessan actualmain Gea a l'iniziativa, èsi tar ils umens mo 37%. Er en las regiuns è il sustegn different, però betg uschè marcant. Entant che la Svizra franzosa (56%) e taliana (52%) èn favuraivlas a l'iniziativa, èsi en la Svizra tudestga mo 42%. Ed era tar la vegliadetgna èsi tenor la retschertga da constatar differenzas. Entant che las persunas giuvnas (18-39 onns) din cun 51% Gea a l'iniziativa – èsi tar ils intermediars (40-64 onns) 41%, e tar persunas attempadas (65+ onns) 44%.
L'iniziativa pretenda dapli responsabladad per l'ambient
La finamira da l'iniziativa inoltrada il favrer 2023 cun 105'940 suttascripziuns valablas è da fixar cunfins liants per l'economia svizra. Cunfins, per che las activitads economicas na pericliteschian betg l'ambient. Concret duain la Confederaziun ed ils chantuns garantir che las grevezzas creadas per l'ambient na dastgan il pli tard en 10 onns betg pli surpassar ils cunfins definids globalmain. Actualmain creescha la Svizra grevezzas per l'ambient ch'èn 19 giadas uschè grondas sco quai ch'i fiss lubì tenor l'iniziativa. E quai duai vegnir fixà en la Constituziun federala sco emprima prioritad.
