Per tge vai?
-
Iniziativa per premias pli bassas
L'iniziativa vul introducir in frain dals custs. En il futur duain il svilup da las pajas e la creschientscha economica prescriver quant fitg ch'ils custs da l'assicuranza obligatorica da malsauns dastgan crescher maximalmain. Il Cussegl federal ed il parlament recumondan da refusar l'iniziativa.
Autor:
RTR online
16.05.2024, 03:04
L'iniziativa pretenda che la Confederaziun ed ils chantuns intervegnan sch'ils custs da sanadad creschan memia fitg. Quai cun resguardar il svilup da las pajas en cumparegliaziun cun las premias da cassas da malsauns. L'avantatg da l'iniziativa saja ch'ella na cumbattia betg las premias autas, mabain la raschun per quellas. Quai sajan numnadamain ils custs per la sanadad, argumenteschan ils iniziants.
L'iniziativa è vegnida inoltrada il 2020 da l'Allianza dal Center (lura anc partida cristiandemocratica). Quai cun 119'000 suttascripziuns.
Il Cussegl federal ed il parlament recumondan da refusar l'iniziativa.
Per omaduas iniziativas che vulan cumbatter ils auts custs en il sectur da sanadad ha il Cussegl federal dentant formulà ina cuntraproposta indirecta.
La cuntraproposta indirecta
Avrir la box
Serrar la box
La cuntraproposta indirecta dal parlament e dal Cussegl federal vegn realisada sche l'iniziativa vegn refusada e sch'ì dat nagin referendum.
La cuntraproposta prevesa d'introducir finamiras per il svilup dals custs en l'assicuranza da malsauns obligatorica. Quellas duain rinforzar la transparenza tar il svilup dals custs.
Las finamiras vegnan fixadas dal Cussegl federal per quatter onns en consultaziun cun las assicuranzas, ils assicurads, ils chantuns ed ils furniturs da prestaziuns. Er ils chantuns pon fixar atgnas finamiras dals custs e da la qualitad, resguardond las directivas dal Cussegl federal.
En il Cussegl Naziunal han 110 parlamentaris e parlamentarias refusà l'iniziativa, 31 han vuschà per ella e 55 èn s'abstegnids da la vusch. En il Cussegl dals chantuns han 20 parlamentarias e parlamentaris refusà l'iniziativa, 14 èn stads per ella, e 10 èn s'abstenids da la vusch.
RTR actualitad
