«Maximalmain 10% da las entradas per las premias da las cassas da malsauns» da la PS
L'iniziativa da la PS «Maximalmain 10% da las entradas per las premias da las cassas da malsauns» saja tranter auter da refusar, perquai che las contribuziuns stuessan uschia vegnir surpigliadas da la Confederaziun. Il Cussegl federal preferescha enstagl plitost la cunterproposta dal parlament. Lez colliescha l'autezza da la reducziun da las premias d'in chantun a ses custs da sanadad.
«Per premias pli bassas» da l'Allianza dal Center
Sumegliant vesia or tar l'iniziativa «Per premias pli bassas» da l'Allianza dal Center. Quest frain da custs saja memia fix per il Cussegl federal e per il parlament, perquai ch'el na resguardia betg facturs sco che la populaziun vegn adina pli veglia ed il progress en la branscha da medischina.
Er qua duai dar enstagl ina lescha deliberada dal parlament. Lez prevesa ch'il Cussegl federal fixescha mintga quatter onns quant fitg ch'ils custs dastgan maximalmain crescher. Sch'ils custs creschian senza raschun pli fitg, lura stoppian il Cussegl federal ed ils chantuns examinar mesiras.
Iniziativa che vul in stop da l'obligaziun da vaccinar
Na, di il Cussegl federal plinavant er a l'iniziativa «Per la libertad e l’integritad corporala» che vul in stop da l'obligaziun da vaccinar. Il Cussegl federal avertescha sche l'iniziativa vegn acceptada, na sajan las consequenzas per la polizia e per l'autoritad d'execuziun dal chasti betg cleras.
Or da l'archiv:
