In comité da pliras partidas – PPS, PLD e verd-liberals ha preschentà ils arguments encunter las duas iniziativas pertutgant ils custs da sanadad:
- L'iniziativa dal frain dals custs da l'Allianza dal Center haja per consequenza che las prestaziuns en il sectur da sanadad vegnan reducidas.
- Cun l'iniziativa dals socialdemocrats che vul distgargiar las premias da las cassas da malsauns – vegnian be ils custs repartids auter.
Las duas iniziativas prendian bain per maun vairs quitads – ils recepts sajan però ils fauss – argumentescha il comité. Las iniziativas giajan memia lunsch. Tenor la cussegliera naziunala da la PLD da Turitg, Regine Sauter, veglian las iniziativas «prescriver a la populaziun in medicament cun effects laterals privlus».
Pli paucas premias, dapli taglia
Oravant tut ils custs che suondan a l'iniziativa da la PS fan quitads al comité. En il mender cas dessi, a partir dal 2030, 12 milliardas francs dapli expensas ad onn per chantuns ed Confederaziun. Sch'ins veglia finanziar quai cun la taglia sin plivalur, alura stuess quella vegnir auzada per fin a 2,3 puncts procentuals. Quai na saja betg social, din ils adversaris.
I vegnia simplamain pumpà dapli daners en il sistem, senza schliar il problem. Ins prendia era davent la motivaziun a la populaziun da spargnar custs.
L'iniziativa pretenda che las premias na dastgian en l’avegnir betg importar dapli che 10% da las entradas dad in tegnairchasa. Las premias sajan ozendi passa duas giadas uschè autas sco anc avant 20 onns, fertant che las pajas e las rentas na sajan strusch s'augmentadas, argumenteschan ils iniziants.
Lung temp da spetga
Tar l'iniziativa che vegn da l'Allianza dal Center tema il comité ch'i vegnia spargnà prestaziuns en ils ospitals, cura che la situaziun economica na saja betg buna. Quai pudessi avair in effect negativ sin la qualitad dals tractaments e procurar per lungs temps da spetga.
La Germania haja introducì in uschenumnà 'budget global per tractaments' e puspè stritgà quel. Per part hajan medis e medias gì duvrà si il budget per tractaments avant la fin dal mais e pazients e pazientas hajan stuì spetgar sin il tractament.
L’iniziativa dal pievel pretenda mesiras sch’ils custs per la sanadad creschan memia ferm cumpareglià cun las pajas. L'avantatg da l'iniziativa saja ch'ella na cumbattia betg las premias autas, mabain la raschun per quellas. Quai sajan numnadamain ils custs per la sanadad creschents, argumenteschan ils iniziants.
