Tgi che è malsaun en Svizra survegn il tractament medicinal necessari. Dapi il 1996 vegnan ils custs per quels surpigliads da l'assicuranza obligatorica da malsauns. Quella vegn finanziada per gronda part tras las premias da las cassas da malsauns e tras las participaziuns als custs. Ils custs per l'assicuranza obligatorica èn creschids fermamain il davos decenni ed uschia era las premias per las cassas da malsauns. Ils chantuns èn obligads da reducir las premias da persunas che han a disposiziun paucs daners. Per far quai retschaivan ellas ina contribuziun da la Confederaziun. Radund in quart da la populaziun survegn actualmain ina reducziun da las premias. La Confederaziun auza automaticamain lur cumpart sch'ils custs creschan, ils chantuns fan be per part quai.
L'iniziativa è vegnida inoltrada il schaner 2020. Per il comité d'iniziativa è cler ch'i saja uss temp d'agir. Las premias per las cassas da malsauns explodeschian ed uschia vegnian adina dapli persunas en difficultads finanzialas.
Il Cussegl federal ed il parlament recumondan da refusar l'iniziativa ed han elavurà ina cuntraproposta indirecta.
L'iniziativa è vegnida lantschada da la partida socialdemocratica. Sper lezza sustegn era la partida Verda l'iniziativa.
