Avant ch’il chantun Vad ha acceptà l'iniziativa pajavan differentas chasadas 15-20% da las entradas per las premias da las cassas da malsauns, ha ditg la directura da sanadad dal Vad Rebecca Ruiz envers Radio SRF. Tenor Ruiz vai exact a quellas chasadas meglier dapi ch'il chantun Vad ha acceptà l’iniziativa.
La capacitad da cumpra è vegnida rinforzada tar chasadas cun ina entrada pitschna e mesauna.
La reducziun da las premias vegn pajada ora en dus pass: sco emprim l’uscheditg normala reducziun da premias ed en in segund pass vegn reducì sin ils 10%. Cun la normala reducziun da premias sustegna il chantun Vad entant mintga terza abitanta. A mintga sisavel abitant vegnan scursanidas las premias fin sin 10%. Quai custa dentant in per milliuns al chantun, perquai tira la presidenta da la Partida liberaldemocratica dal Vad, Florence Bettschart, plitost ina bilantscha negativa. Envers SRF ha ella ditg ch'i saja enorm char e ch'ins haja stimà mal ils custs.
Avant l'introducziun han ins discurrì da 500 milliuns francs l'onn, uss custa quai passa 800 milliuns. Quai correspunda ad 8% dal preventiv dal Vad.
Motiv per ils custs pli auts sajan oravant tut las premias che creschan. Sche quellas creschan, crescha er il dumber da persunas ch'ha da bun reducziuns. L’onn passà ha il chantun Vad per l’emprima giada scrit cifras cotschnas dapi 20 onns. Dentant hajan ins era reducì las entradas d’impostas. Perquai di Felix Stürner, deputà dals verds dal Vad, ch'il chantun haja tuttina in bun plimatsch e possia sa lubir quai.
Las reducziun na survegnan betg tut las persunas. Ins sto lavurar parzialmain. Dentant persunas singulas almain 70% e pèrs almain 140%. Quai dettia in fauss impuls, di la presidenta da la Partida liberaldemocratica dal Vad Florence Bettschart.
Schefs da firmas hajan rapportà che divers impiegads na vulevan betg lavurar dapli perquai ch'els avessan uschia pers il dretg sin las reducziuns. Quella critica da vart burgaisa renviescha la directura da sanadad dal Vad Rebecca Ruiz. I saja da resguardar che betg tut las persunas possian lavurar dapli che 70% – uschia la socialdemocrata envers SRF e numna l’exempel d’ina mamma che educhescha ils uffants suletta. Perquai saja fauss da far ina discussiun enturn ils pertschients.
Era sche la critica envers il model n'è betg fitg gronda en il chantun Vad procura l’introducziun dals 10% tuttina era tschintg onns suenter per discussiuns.