33% da las spezias en Svizra èn periclitadas, 2% èn gia mortas or. Motivs per quai èn tranter auter la midada dal clima, dapli mobilitad dals umans, vischnancas che creschan ubain agricultura intensiva. La Confederaziun investescha mintg'onn var 600 milliuns francs en mesiras per la biodiversitad. Quests daners vegnan tranter auter da bun a projects per proteger e tgirar cuntradas, biotops e reservats u er a puras e purs che protegian la natira e s'engaschan per la biodiversitad. L'agricultura survegn la pli gronda part da quests raps. Er existan gia inventaris da cuntradas, maletgs dals lieus u lieus istorics protegids u degns da proteger. Quels prevesan per exempel reglas pli severas per construir.
Per las persunas che stattan davos l'iniziativa è quai dentant memia pauc. En l'iniziativa pretendan ellas reglas en general pli severas, dapli raps e dapli surfatschas protegidas. Davart las surfatschas na fan ellas naginas indicaziuns concretas. Tar ils custs quinta il Cussegl federal cun 400 milliuns francs dapli per Confederaziun e chantuns.
Ils aderents e las aderentas èn da l'avis che la Svizra fetschia memia pauc per la biodiversitad e sia protecziun.
Da la vart dals adversaris e las adversarias è l'opiniun generala: La biodiversitad è impurtanta, dentant fa la Svizra gia avunda per la natira.
Il Cussegl federal sco er il parlament recumondan da dir Na a l'iniziativa. Il Cussegl naziunal ha vuschà cun 124 cunter 72 vuschs cunter l'iniziativa. Il Cussegl dals chantuns è s'exprimì cun 33 cunter 12 vuschs, encunter l'iniziativa.
