Per l'uniun chantunala dals purs grischuns è l'iniziativa da biodiversitad ina iniziativa ch'impedescha – numnadamain ils purs da sviluppar lur menaschis. Thomas Roffler, il president dals purs grischuns ha en la conferenza da medias a Pasqual er argumentà che l'iniziativa persequiteschia pli fitg la protecziun ch'il niz.
Ils purs grischuns hajan in bun equiliber da niz e protecziun per lur bains e cun l'iniziativa vegnia quel or da l'equiliber. Plinavant ha Roffler er argumentà ch'ils iniziants hajan inoltrà ina iniziativa senza contactar e dumandar ils purs ch'èn directamain pertutgads. L'iniziativa sajettia cleramain sur las finamiras, di Roffler. Quai mussia er il fatg ch'il Cussegl federal ed il parlament refusan l'iniziativa.
Da las autras organisaziuns purilas ch'èn stadas preschentas, ha Astrid Derungs argumentà cunter l'iniziativa sco presidenta da l'Uniun da las puras grischunas. Tenor ella è l'iniziativa da biodiversitad ina gronda cuntradicziun a la segirezza dal provediment ed a la segirezza alimentara. Per ils purs e las puras giuvnas ha Sina Beck da Grüsch discurrì, e fatg attent che la biodiversitad saja impurtanta per las famiglias purilas svizras. La famiglia purila ospitanta Andi e Christian Obrecht han lura anc mussà las prestaziuns per promover la biodiversitad sin lur bain puril. Sin ses manaschi saja la biodiversitad intacta, ha il pur da Pasqual punctuà.
