Il Cussegl federal cusseglia da dir Na a l’iniziativa da la biodiversitad. Ella resguardia bain aspects impurtants, dentant giaja ella memia lunsch, ha ditg il minister da l’ambient Albert Rösti.
L’iniziativa pretenda da la Confederaziun e dals chantuns da far dapli per la biodiversitad e da metter a disposiziun ulteriurs daners ed ulteriuras surfatschas. Tenor Rösti restrenschan las pretensiuns l’agricultura e las energias regenerablas e pericliteschan las infrastructuras. La Confederaziun ed ils chantuns protegian la natira gia daditg. La Confederaziun investeschia mintga onn var 600 milliuns francs en la biodiversitad. Cun l'iniziativa vegnissan custs supplementars da 400 milliuns vitiers. Daners che la Confederaziun stuess cumpensar insanua auter.
Sper la biodiversitad vul l'iniziativa era proteger meglier la cuntrada e la fatscha dal vitg. Radund 20% da tut ils vitgs sajan gia en l'inventari per fatschas dal vitg cun muntada naziunala (Isos). Là saja bajegiar gia uss pretensius, e cun l'iniziativa vegniss quai anc pli pretensius, ha ditg Rösti.
Radund in quart da las surfatschas da la Svizra saja en inventaris da natira u cuntrada, da la Confederaziun u chantuns. Quellas sajan protegidas gia uss ed i na dovria naginas ulteriuras mesiras inflexiblas.
Il pievel decida ils 22 da settember davart l'iniziativa da biodiversitad e la refurma da las cassas da pensiun.
