L'institut svizzer per products terapeutics, Swissmedic, ha approvà il quart vaccin encunter il coronavirus. Quel ha num Nuvaxovid ed è dal producent Novavax. Cun quel pon persunas a partir da 18 onn vegnir vaccinadas ed igl è l'emprim che sa basa sin proteins.
Set dis suenter la segunda squitta saja la protecziun dal vaccin tar radund 90%, scriva Swissmedic. Plinavant adempleschia il vaccin tuttas pretensiuns da segirezza. Nuvaxovid sto vegnir dà duas giadas en il decurs da trais emnas. Il vaccin po vegnir mantegnì fin a nov mais en frestgera, quai che saja ord vista logistica fitg impurtant.
Vaccin sin basa da protein
Nuvaxovid saja in vaccin da protein e betg – sco quels da Pfizer/Biontech e Moderna – in vaccin da mRNA. El cuntegnia ina part betg infectusa da la surfatscha dal virus da Sars-CoV-2, scriva Swissmedic. Sch'il corp vegnia en contact cun quel, dettia ina reacziun d'immunitad.
Nuvaxovid è lubì per dus onns, sco in pledader da Swissmedic ha declerà. Quai saja in standard internaziunal per novs medicaments. Er ils ulteriurs vaccins da Covid-19 hajan questa limitaziun. Cun Nuvaxovid ha Swissmedic approvà in quart vaccin cunter Covid-19. Gia lubids èn ils vaccins da Pfizer/Biontech (lubì ils 19 da december 2020), Moderna (12 da schaner 2021), Johnson & Johnson (22 da mars 2021).
