Ussa è la via libra per ina terza dosa da vaccin cunter corona en Svizra. Swissmedic ha dà la lubientscha per ils vaccins da Moderna e Biontech/Pfizer, quai ha l’Institut svizzer per products terapeutics communitgà.
Vaccin da rinfrestgament
Studis mussan che la protecziun dal vaccin lascha spezialmain suenter tar persunas sur 80 onns. Perquai cusseglia la Confederaziun da prinzipi las uschenumnadas vaccinaziuns da «booster» a persunas sur 65 onns. En spezial dentant a las suandantas gruppas da persunas:
- cussadentas e cussadents da chasas d'attempads e tgira
- persunas da passa 65 onns cun grevas malsognas
- persunas a partir da 75 onns
Persunas en questas gruppas pon s'annunziar a partir dal november per laschar dar il «booster», uschia il BAG. Responsabels èn ils chantuns, che sa preparan per dar quellas a partir da mez november.
Persunas cun sistem d'immun debel
A persunas cun sistem d'immun debel recumonda il BAG gia da laschar dar ina terza dosa. Tar persunas cun in sistem d'immun fitg flaivel na sa tractia quai dentant betg d'in «booster» mabain è part da la vaccinaziun da basa sche la resposta dal sistem d'immun è schletta ubain manca daltut. Talas persunas pon laschar dar la terza dosa suenter almain 28 dis.
