Analisas d'annunzias actualas hajan mussà ch'i dettia en questas gruppas da vegliadetgna pli savens las inflammaziuns dal muscul dal cor (miocarditis) che cun il vaccin da Biontech. Perquai valan questas recumandaziuns tant per las emprimas vaccinaziuns, sco er per il booster. Era sch'ins haja sco emprim duvrà il vaccin da Moderna, duai suenter vegnir duvrà quel da Biontech/Pfizer.
Il gremi d'experts saja sa referì sin datas dal Paul-Ehrlich-Institut e datas internaziunalas. Plinavant vegn recumandà che dunnas en speranza duain survegnir independent da la vegliadetgna il vaccin da Biontech. Quai malgrà ch'i na dettia anc naginas datas cumparegliablas.
Anc betg decisiun definitiva
I na sa tracta tar questa recumandaziun dentant anc betg d'ina decisiun definitiva. La proposta vegn anc tramessa en consultaziun tar ils experts e tar ils Bundesländer tudestgs. Midadas sajan perquai anc pussaivlas.
Er en Frantscha vegn cusseglià a persunas sut 30 onns da laschar dar il vaccin da Biontech/Pfizer. Moderna ha annunzià mardi ch'i hajan dà en a l'autoritad d'admissiun la dumonda da pudair dar il vaccin ad uffants fin a sis onns. Anc n'è nagin vaccin lubì per uffants sut 12 onns.
