Grazia a reservas d'aua en ils lais da fermada duai la Svizra avair la fin da l'enviern avunda electricitad. I va per il temp cura che la Svizra po importar damain ed era producir sezza damain electricitad. La cumissiun federala per l'electricitad (ElCom) ha preschentà sias directivas per sa preparar sin la mancanza d'energia pussaivla.
Interpresas d'energia duain tegnair enavos aua en ils lais da fermada per producir cun quella electricitad en ina situaziun d'urgenza. La reserva d'aua duai segirar l'electricitad durant paucas emnas. La ElCom parta d'ina reserva da maximal 660 uras gigawatt, quai correspunda circa al basegn d'energia annual da 150'000 chasadas.
Nagina schliaziun finala
La reserva da forza idraulica gidia da segirar il provediment d'energia en Svizra. Sch'i dettia en l'entira Europa ina stgarsezza d'electricitad, lura possian las reservas d'aua mo gidar limitadamain, pertge che quella na porta nagina energia supplementara en il sistem.
La energia duai vegnir tegnida enavos per il temp tranter il prim da december ed ils 15 da matg. Lu cumenzan ils lais da fermada puspè a s'emplenir, sco ins sa dir or d'experientscha. La reserva da 660 uras gigawatt vegnia a custar plirs tschient milliuns francs. Pli exact na possian ins betg calcular quai, cunquai ch'i dependia dals pretschs a la fiera d'electricitad.
Tenor la ElCom duai il Cussegl federal relaschà l'ordinaziun l'entschatta settember. Il prim d'october duai quella entrar en vigur.
Las duas producentas d’electricitad grondas el Grischun, la Repower e l’EWZ, beneventan ch’il Cussegl federal vul stgaffir ina tala reserva d’aua. Michael Roth, il responsabel per la producziun da la Repower, crai dentant che quella vegn a custar bler.
L’aua en ils lais è gia vendida. Sch’ins vul ussa tegnair enavos quell’aua, lura ston ins cumprar enavos quella dal martgà ed actual èn ils pretschs fitg auts.
Harry Graf, il pledader da l’EWZ, menziunescha anc in segund punct che pudess far in stritg tras il quint dal Cussegl federal.
Nus avain memia pauc aua il mument e cun quai ina reserva memia pitschna per pudair tegnair enavos aua en ils lais da fermada.
Omadus accentueschan era che lur focus saja sin in provediment segir da lur clients locals en il Grischun. Auter che per exempel l’AXPO na possian els betg vender tut la producziun al martgà.