- Per pudair finanziar las expensas che creschan tar l'armada e tar la AVS sco era per ulteriurs projects – sto la Confederaziun spargnar en auters lieus.
- Cun in pachet da mesiras èsi previs da spargnar 2,7 milliardas francs il 2027 e 3,6 milliardas francs il 2028.
- Tut en tut trametta il Cussegl federal en consultaziun 59 mesiras da spargn. Tranter auter ils chantuns, partidas e partenaris socials pon uss s'exprimer davart quellas.
- Il pachet pudess divider las oppiniuns. Gia tar la preschentaziun il settember n'eran divers chantuns e partidas betg cuntents cun las propostas.
Il Cussegl federal ha deliberà il project da consultaziun tar l'uschenumnà pachet da distgargia 27 (EP27). Quel è necessari, perquai che la Confederaziun spetga tenor la planisaziun actuala da finanzas deficits structurals da fin a 3 milliardas francs ils onns 2027 e 2028. «Quai è d'attribuir a la creschientscha bler pli svelta da las expensas en cumparegliaziun cun las entradas», scriva il Cussegl federal.
Il parlament ha per exempel concludì che l'armada duai survegnir pli svelt dapli daners, quai che signifitga expensas supplementaras annualas da var ina mesa milliarda francs. Ultra da quai na saja anc adina betg sclerida la finanziaziun da la 13avla renta da la AVS che pudess engrevgiar il budget da la Confederaziun supplementarmain gia a partir da l'onn 2026 cun fin 1 milliarda francs.
«La realisaziun da las mesiras è tranter auter la premissa per in augment accelerà da las expensas per l'armada e per finanziar la contribuziun federala a la AVS», scriva il Cussegl federal en ina communicaziun. Plinavant saja da quintar cun ulteriurs custs en connex cun las relaziuns cun l'Uniun Europeica u er cun entradas che scrodan perquai che la valur da l'atgna locuziun pudess vegnir abolida.
Senza mesiras da spargn na possian las directivas constituziunalas dal frain da debits betg pli vegnir ademplidas, constatescha il Cussegl federal plinavant. Las expensas federalas creschissan a media vista vinavant per dapli che 2% per onn e quai malgrà il pachet da distgargia.
36 da las 59 mesiras pretendan tenor il Cussegl federal ina midada da lescha. Il parlament duai decider davart in relasch da mantè correspundent. Las mesiras senza midadas da lescha pon vegnir realisadas en il process da budget.
Principalmain reducziuns d'expensas
En cumparegliaziun cun ils puncts centrals annunziads il settember ha il Cussegl federal fatg pliras midadas. Perquai ch'il parlament para da desister da novas contribuziuns federalas a la tgira d'uffants cumplementara a la famiglia è il basegn da spargn e consequentamain er il volumen spargn da l'entir pachet EP27 er var 800 milliuns francs per onn pli bass. Vi dals princips na sa midia dentant nagut, argumentescha il Cussegl federal. Ils respargns a favur da las finanzas federalas duain pia vegnir fatgs per gronda part cun reducir las expensas. Mo var 300 milliuns francs – pia 10% dal pachet – duai vegnir da la vart da las entradas. Quai en emprima lingia en furma d' abolir u scursanir reducziuns da taglia.
En connex cun taglias sin retratgas da chapital or da las pitgas 2 e 3a ha il Cussegl federal adattà il model envers la proposta da la gruppa d'experts. Tenor il Cussegl federal duain retratgas da chapital vegnir suttamessas er vinavant separadamain da las ulteriuras entradas a la taglia. Ina nova tariffa speziala progressiva remplazza las tariffas vertentas.
Pachet da spargn divida las opiniuns
Il Cussegl federal è da l'avis ch'i saja impurtant che tut ils secturs d'incumbensa contribueschian ina part.
Er l'administraziun federala duai contribuir cun 300 milliuns francs als respargns, spezialmain cun spargnar en il sectur dal persunal. Il pachet pudess er divider las opiniuns en la fasa da consultaziun. Gia l'atun eran pliras partidas ed er ils chantuns malcuntentas cun las propostas dal Cussegl federal.