- L'Uffizi federal d'assicuranzas socialas BSV ha fatg sbagls cun quintar l'assicuranza per vegls e survivents AVS. L'assicuranza è pli fitta che quintà fin ussa.
- Las expensas per l'AVS pudessan esser fin l'onn 2033 radund quatter milliardas francs pli bassas che spetgà. Quai è radund 6% sut la prognosa d'enfin uss.
- L'Uffizi federal d'assicuranzas socialas ha entant curregì las perspectivas finanzialas da l'AVS.
Cun lavurs da controlla hajan ins constatà, che las expensas per l'AVS parian a lunga vista nunexplitgabel autas, ha communitgà il BSV ad ina conferenza da medias a Berna. La raschun persuenter sajan duas furmlas nuncorrectas en il program da quintar. Il deficit da repartiziun vegnia a crescher fin l'onn 2033 sin radund quatter milliardas francs. Enfin uss spetgavan ins in deficit da passa set milliardas francs.
La Confederaziun spetga consequenzas minimas per la 13avla renta
Fin la fin da l'onn duain ils resultats da l'examinaziun esser davant maun. Cun l'examinaziun saja la chanzlia turitgaisa Bratschi vegnida incumbensada, suenter ch'ins aveva constatà ils sbagls. Ins lavuria era vidlunder da garantir che las perspectivas da finanziaziun èn en l'avegnir pli fidaivlas.
Bruno Parnisari – directur substituint da l'Uffizi federal d'assicuranzas socialas BSV – punctuescha, ch'ils votants e las votantas n'han betg survegnì cifras incorrectas sco basa per la votaziun davart la 13avla renta d'AVS. Sulettamain il basegn da finanzas pudess tenor novas calculaziuns esser pli bass che spetgà. Ils custs per la 13avla renta sajan per il 2026 tar radund 4,2 milliardas ed il 2030 tar stgars 5 milliardas francs ad onn. Il Cussegl federal vegna proximamain a decider ils proxims pass tar la 13avla renta ed il BSV vegna a preparar la missiva e la consultaziun.
