Il Cussegl federal quinta ils proxims onns cun deficits structurals da var 3 milliardas francs per onn. Quels sajan d'attribuir ad in grond augment da las expensas, surtut a favur da l'AVS e da l'armada. Ina cumissiun externa d'experts intervegn ussa per incumbensa dal Cussegl federal cun in grond pachet da spargn. Da princip duain tut ils secturs da la Confederaziun strenscher la tschinta.
Il president da la gruppa d'experts Serge Gaillard ed anteriur schef da l'administraziun federala da finanzas ha preschentà las propostas da spargnar. Ina survista:
Politica d'integraziun: La politica d'integraziun per persunas retschavidas provisoricamain e per persunas fugidas duai avair la finamira prioritara d'ina integraziun svelta en la vita professiunala. Uschia sa laschan spargnar las expensas per sustegnair las persunas pli tard e l'obligaziun da la Confederaziun als chantuns da pajar ina indemnisaziun durant quatter onns.
Politica dal clima e d'energia: I duai vegnir fatg diever pli e pli da las taxas directivas, da las prescripziuns d'emissiun e da las prescripziuns tecnicas. Quai permetta da reducir e priorisar las expensas per las subvenziuns a possessuras ed a possessurs d'immobiglias ed ad interpresas. Las contribuziuns finanzialas a singulas interpresas ed a tschertas branschas duain vegnir reducidas drasticamain u stritgadas.
Infrastructura da traffic: Las contribuziuns finanzialas en il fond per l'infrastructura da viafier ed en il fond per las vias naziunalas e per il traffic d'aglomeraziun duain vegnir reducidas. Ils projects che n'èn anc betg en construcziun ston ultra da quai vegnir priorisads da nov. Quai pretendiss ina midada da la constituziun cun ina votaziun dal pievel.
Contribuziuns chantunalas: La Confederaziun duai desister da contribuziuns e prestaziuns ch'èn en il champ da cumpetenza dals chantuns. I duain per exempel vegnir stritgads dal tuttafatg agids finanzials per la tgira d'uffants cumplementara a la famiglia. L'augment per la gulivaziun da las grevezzas sociodemograficas d'avant dus onns stoppia ultra da quai vegnir annullà.
Subvenziuns pli pitschnas: Da «subvenziuns da bagatella» stoppia – tenor la gruppa d'experts – vegnir desistì en il futur. Las contribuziuns voluntaras ad organisaziuns internaziunalas ordaifer la cooperaziun internaziunala al svilup sco er agids finanzials per la promoziun dal sport duain vegnir reducidas per 10%. I duai vegnir desistì dal tuttafatg da la lescha per la furmaziun supplementara.
Tut en tut propona la gruppa d'experts 60 mesiras che resulteschan a 5 milliards damain expensas. En tut èn quai 5% da las extradas dal preventiv da la Confederaziun.
Intginas partidas sustegnan
Las reacziuns èn maschadadas. Tenor la Partida populara svizra èsi in bun program da spargn – ed i duai vegnir spargnà anc dapli. Era la Partida liberaldemocratica beneventa ils plans da spargn da la gruppa d'experts. Oravant tut quels tar las subvenziuns. Ch'il rapport va en la gista direcziun scriva la Partida verd-liberala. Tenor il president da l'Allianza dal Center èsi anc memia baud da valitar il rapport.
Ils proxims pass
Ils chantuns, las partidas ed ils partenaris socials duain pudair s'exprimer davart las propostas avant ch'il Cussegl federal prenda decisiuns essenzialas. Lura vegn il Cussegl federal a decider tge mesiras ch'el vul persequitar vinavant e trametter en la consultaziun. Tenor quella duain vegnir realisadas emprimas distgargias da las finanzas a partir dals onns 2026 e 2027.
