Uss èsi cler co che la 13avla renta da l'AVS duai vegnir realisada e finanziada. Il Cussegl federal ha fixà las directivas. Uschia duai la 13avla renta vegnir pajada a partir dal 2026 mintgamai il december, sco il Cussegl federal ha infurmà. Las expensas pervi da la 13avla renta creschan fin il 2030 sin 5 milliardas francs.
Per tegnair l'equiliber gia davent da l'entschatta duai la taglia sin la plivalur vegnir augmentada. Per quant vegn il Cussegl federal a decider l'atun sin basa da las novas perspectivas da finanziaziun da l'AVS. La cumpart che la Confederaziun contribuescha mintga onn a l'AVS duai vegnir sbassada da 20,2% sin 19,5%. Quai èn anc bun 500 milliuns francs.
In augment da las contribuziuns da la pana n'è betg pli previs. Quai perquai che las perspectivas per l'AVS sajan sa megliuradas suenter che l'Uffizi federal per assicuranzas socialas avava concedì d'avair fatg sbagls da calculaziun.
L'atun vul il Cussegl federal deliberar il messadi al parlament per che quel possia tractar la fatschenta en la sessiun d'enviern 2024 ed en la sessiun da primavaira 2025. Sur da la midada da la taglia sin plivalur sto lura en mintga cas anc il pievel decider e cunter la midada da la lescha èsi anc pussaivel da far referendum.
