Questa emna audan ils passagiers e las passagieras en il tren da las Viafiers federalas tranter Cuira e Turitg in bainvegni tut spezial. Suenter l’avis per tudestg ed englais suonda in bainvegni rumantsch. Quai è ina acziun en connex cun l'emna rumantscha ch'il Departament federal d'affars exteriurs organisescha. L’acziun sco tala dal bainvegni rumantsch en ils trens è naschida d'Alberto Palaia, il delegà dal post spezialisà per la plurilinguitad dal chantun Grischun. Tge duai l'acziun effectuar?
Cuntanscher in public vast cun ina acziun pitschna che custa praticamain nagut. Per uschia sensibilisar la glieud per la lingua rumantscha.
Tenor Alberto Palaia sajan ils responsabels da las Viafiers federalas immediat stads fieu e flomma cura ch'el haja preschentà l'idea. L'acziun saja fitg simpla e custia praticamain nagut. Da beneventar saja era che l'emna rumantscha crodia gist en las vacanzas da sport dal chantun Turitg. Entras quai sajan anc dapli persunas da viadi quels dis. Sin la dumonda sche questa acziun saja plitost ina sgnocca, di Alberto Palaia che quai na saja betg il cas.
I duess muventar in zic la conscienza per la plurilinguitad da la Svizra.
Reacziuns da passagiers
Las reacziuns dals passagiers e las passagieras èn positivas. Betg tuttas e tuts han udì il bainvegni rumantsch conscientamain. Intginas persunas eran fatschentadas cun leger cudeschs, baterlar u tadlar musica. Ad autras è il bainvegnì crudà en ureglia. Ed exact per quai giaja la fin finala er en l'emna – per sensibilisar la glieud per la quarta lingua naziunala, il rumantsch. Saja quai en Svizra u a l'exteriur en las ambassadas svizras.
I va per propagar la plurilinguitad da la Svizra, pia era il rumantsch en las ambassadas svizras.