Berna - Emna rumantscha cumenza cun workshop da cuschinar

Prendì part al workshop da cuschinar capuns e bizochels ha tranter auter cusseglier federal Ignazio Cassis. Tenor el «sa furman or da nossa diversitad ideas innovativas». Il workshop saja in mussament per quai. L'idea è numnadamain stada ina da las propostas da classas da scola rumantschas ch'èn stadas sin visita a Berna il 2022.

Rumantsch e la diplomazia

Er prendì part al workshop han tranter auter represchentantas d'ambassadas svizras en l'Italia, la Frantscha e la Gronda Britannia. Ils represchentants da la Svizra en auters pajais duain uschia emprender d'enconuscher meglier la cultura rumantscha.

Durant l'Emna rumantscha organisescha plinavant l'ambassada a Londra ina «saira retoromana», ed en l'ambassada a New York datti in curs da lingua da rumantsch cun Chasper Pult. Quest onn datti gia la terza ediziun da l'Emna rumantscha. Ella è part d'ina seria d'occurenzas che duain mussar l'impurtanza da la plurilinguitad en Svizra, sco per exempel la «Semaine de la francophonie» u la «Setttimana della lingua italiana nel mondo».