Igl è l’emprima giada che l’Emna rumantscha vegn festivada en il Congo en l'Africa Centrala. Il pajais ha 5 linguas naziunalas. Discurridas vegnan dentant passa 380 linguas, di l'ambassadur svizzer Chasper Sarott.
A l'occasiun da l'emna rumantscha ha l'ambassadur oriund da Sent visità l'Universitad da Kinshasa e declerà la Svizra cun sia democrazia directa ed il federalissem a maun dal rumantsch.
Ch'ina minoritad ha survegnì il status d'ina lingua naziunala fa star stut a divers, di Sarott. Oravant tut la voluntad da la politica e da la populaziun dad avair acceptà il rumantsch sco ina da las linguas da la Svizra. Ina basa legala per ina minoritad saja plitost l’excepziun.
El ha empruvà da mussar ch'ina minoritad è in enritgiment per in pajais. Ed il Rumantsch è ina lingua ed ina cultura cun quella ch’ins possia preschentar bain la Svizra, di Sarott. Sco Rumantsch èn ins dentant tut onn ambassadur per la lingua e betg mo durant l’Emna rumantscha.
Emna Rumantscha
Ils 20 da favrer cumenza mintga onn l'Emna rumantscha. Quai è il di ch'il rumantsch è daventà lingua naziunala en Svizra (ils 20 da favrer 1938).
Diversas ambassadas da la Svizra en tut il mund fan en quell’emna activitads enturn il rumantsch. Ma era en Svizra vegn fatg attent al rumantsch cun differentas acziuns.
L'emprima Emna rumantscha hai dà il 2021. L'intenziun da l'Emna rumantscha è da far vegnir pli enconuschent il rumantsch. L'iniziativa da l'emna vegn dal Departament da l'exteriur cun agid da la Lia Rumantscha e dal chantun Grischun.