Quant electricitad solara pon ils tetgs svizzers furnir? Davart quai infurmescha l’uschenumnà potenzial solar. La Svizra nizzegia ussa per l’emprima giada 10.1 % da quel dapi la fin d’emna. Sulettamain l’onn passà è questa valita creschida per trais puncts procentuals. Quai mussan las pli novas calculaziuns da la firma Geoimpact SA. «Ils ultims tschintg onns èn stads in temp dad aur per l’energia solara», di David Stickelberger, il vicemanader da fatschenta da l’associaziun interprofessiunala Swiss Solar. «Auts pretschs d’electricitad ed il medem mument reducziuns da custs tar moduls solars han rendì ovras fotovoltaicas fitg attractivas.» Ma betg dapertut crescha l'electrizitad solara tuttina, sco quai che la suandanta carta mussa:
Sco bain visibel sin la charta è il svilup da la fotovoltaica fitg avanzà surtut en la regiun dal Lai da Constanza , en parts da Friburg ed en il chantun da Lucerna. En il Rottal lucernais utiliseschan las vischnancas Ruswil e Buttisholz mintgamai in quart da lur surfatschas adattadas. Quai po vegnir attribuì cunzunt er als gronds tetgs industrials ed agriculs che vegnan duvrads en questas vischnancas. Be a Buttisholz stattan per exempel 30 implants pli gronds che han ina prestaziun da 100 fin 850 kilowatts. Implants sin chasas d'ina famiglia han tipicamain 8 fin 12 kilowatts. Er la gronda part da las autras vischnancas da Lucerna è sur la valita svizra da 10%. È Vossa vischnanca sur u sut quella valita?
Las regiuns alpinas sa chattan en general sut la marca da 10%. Singuls implants gronds han mintgamai ina valita maximala da 29.5%: Giornico en il Tessin sa chatta tar 35.4%, là è installà in indrizs cun ina prestaziun da 3'082 kilowatts sin in tetg industrial. La vischnanca vischina Personico sa chatta tar 24.2% . En il Grischun cuntanscha Favugn il maximum dal chantun da 29.5% , cunzunt grazia a l'implant da 1'451 kilowatts en in'anteriura chava da crappa.
En Svizra èn registrads en il fratemp 269'828 implants – cun ina prestaziun da totalmain 6'671 megawatts. Quai è dubel uschè bler sco la prestaziun installada da tut las ovras nuclearas svizras (3'015 megawatts) che produceschan dentant anc adina dapli electricitad sur l'onn entir. Sch'ins guarda mo sin la prestaziun installada en tut è il chantun Berna a la testa cun 820'772 kilowatts, schebain ch'il chantun utilisescha mo var 9% da sias surfatschas ed è uschia sut la valur svizra. Ils ultims quatter onns ha Berna pli che dublegià sia prestaziun solara. Cleramain damain prestaziun en la summa cuntanscha il chantun Lucerna cun 507'432 kilowatt , malgrà ch'il potenzial è cun 14.5% nizzegià meglier ch'a Berna. Malgrà grondas differenzas vala la tendenza generala en tut la Svizra:
Tuts chantuns suondan al trend. Sche quai resta uschia è grev da dir. I bastan dentant era main che 100%: «La Svizra stuess trair a niz circa 40% dal potenzial sin ils tetgs per ademplir las finamiras da la nova lescha d’electricitad 2035», di David Stickelberger da Swiss Solar. Cun in tempo da svilup sumegliant als ultims onns fiss quai senz’auter pussaivel. In potenzial anc betg utilisà vesa Stickelberger en emprima lingia tar chasas da pliras famiglias che pudessan profitar pli savens da l'agen consum cuminaivel e tar gronds tetgs sin edifizis industrials.
Artitgel original sin srf.ch
